Буряад Уласай соёлой яаманай хүтэлбэри Прибайкалиин аймагаар ябажа, соёлой эмхинүүдэй ажаябуулгатайнь танилсаба. Аймагай зүүн баруун эрьеэр хоёр бүлэг боложо, хубаараад, бүхы һуурингуудые шалгаһан байна.

Соёлой сайд Нестерово, Карымск тосхонуудай соёлой байшанай болон номой сангуудай ажалтай танилсаад, Турунтаево тосхоной архив болон аймагай хизаар ороноо шэнжэлэлгын музей үзэбэ. Хүүгэдэй искусствын байшанда Тимур Цыбиковта үхибүүд болон багшанар хэжэ байһан ажал тухайгаа фильм харуулаа.

Экономикын хүшэр сагта гүрэнэй грантын дэмжэлтэдэ хүртэхэдэ шухала гэжэ соёлой сайд тэмдэглээ.

- Ушар юуб гэхэдэ, Прибайкалиин аймагай соёлой эмхинүүд грантын харалгануудта ехэ үсөөнөөр хабаадана. Нёдондо жэл нэгэшье эмхи мэдүүлгэ баряагүй. Хүдөөгэй һуурингуудай музейнүүдые сэхэ мүнгэн зөөреэр һомолхо арга хүшэр байдаг. Тиимэһэ дэмжэлтэ абаха гэбэл, элдэб грантнуудай харалганда хабаадаха хэрэгтэй. Буряад Уласай соёлой эрхим эмхи 100 мянган түхэригтэ хүртэдэг, харин ажалшад 50 мянган түхэриг шүүдэг. Энэ хадаа зургаан эмхинүүд, арбан ажалшад гээд жэл бүри иимэ грантнуудта хабаадажа, иладаг юм,- гээд Тимур Гомбожапович һануулба.

Мүн лэ соёлой сайд Прибайкалиин аймагай һуурингуудай толгойлогшонортой болон соёлой ажалшадтай уулзалга үнгэргөө. Эндэ гол түлэб салин хүлһэнэй орёо асуудал, муниципально байгуулалтануудай хэмжээндэ даалгагдалга, хүдөөгэй клуб, номой сангуудай тэдхэлгэ тухай хэлсэгдээ.

- Нэгэ үдэрэй туршада бүхы ажаһуудалай асуудалнуудтай танилсажа үрдихөөр бэшэ. Зүгөөр эмхинүүдэй материально- техническэ һуури һайн байна гэжэ мэдэбэбди. Һүүлэй жэлнүүдтэ ехэ ажал хэгдэһэн байна. Хэдэн һалбаряар Буряад Уласай һангай мүнгэн зөөриһөө тэдхэмжэ үгтэһэн гэжэ эли байна. Соёлой байшангууд һандарһан, заримань угаа хүшэр байдалтай. Энэ асуудалнуудые шиидхэхэ ниитэ инфраструктурын ашаар лэ шиидхэхэ арга байна. ТОС-ой хүдэлөөнүүдэй эдэбхитэд соёлой ажалшад байһаниинь һайшаалтай. Соёлой эмхинүүдые өөһэдын хүтэлбэриин даалга доро оруулха тухай үшөө орёо асуудал гээшэ,- гэжэ сайд тэмдэглээ.

Мүнөөдэрэй байдалаар, 2015 оной январиин 1-һээ номой сангай хангалга муниципально аймагуудай харзалга доро үгтэнхэй.

- Юундэ Прибайкалиин аймагуудта номой сангууд нютагай хүдөөгэй захиралай харууһан доро үгтөө юм, гэжэ гайханаб. Буряад Улас дотор иимэ хоёр аймагууд бии. Тэрэниие һэлгүүлхэ хэрэгтэй. Арадай уран һайхан урлал эрхилдэг ажалшадай һуури аймагай мэдэлдэ үгөөд, харин техническэ хүдэлмэришэд-нютагай захиргаанай һан доро оруулагдаха ёһотой.

Иимэ жэшээтэ дүршэл бии, зүгөөр соёлой ажалшад нютагай захиргаанай мэдэлһээ гарашаха гэжэ айлтагүй. Энэ болон бусад асуудалнуудые зүбшэжэ хэлсэхэ шухала,- гэжэ Тимур Цыбиков тэмдэглээ.

Соёлой ажалшадай мэргэжэл дээшэлүүлхэ талаар сайд иигэжэ онсолбо:

- Соёлой һалбарида соёлой мэргэжэлдэ хабаагүй зон ажаллаха ёһогүй. Эндэ байһан зон соо Зүүн Сибириин соёлой академидэ мэргэжэлээ дээшэлүүлжэ байһан оюутадые харахада урматай байна. Мүнөө сагта мэргэжэлгүй аад, уран һайханиие хүтэлбэрилэгшөөр ажаллажа байһан хүнэй ушар зорилгогүйгөөр мүнгэ гаргашалагдажа байһан гэжэ хуулиин ёһоор тоологдоно. Эмшэнээр эмшэн, багшаар багша хүдэлнэ ха юм, харин соёлой ажалшад соёлой мэргэжэлтэй байха ёһотой, -гэжэ Буряад Уласай соёлой яаманай сайд Тимур Цыбиков тодорхойлбо.