2013 оной hүүл багаар Буряад театр хотын залуу гэр бүлэнүүдтэ зүжэг наадануудые hаадгүй хаража байха арга олгохо зорилготой шэнэ шэглэлээр ажаллажа захалаа бэлэй.

Ушар юуб гэхэдэ үдэшэндөө үхибүүдээ орхижо гэрhээ гараха аргатай залуу бүлэнүүд хоморшог. Тэдэ бүлэнүүдэй Буряад театр ошожо зүжэг хараха хүсэлэн дэмжэжэ, тайзан дээрэ зүжэгэй ябажа байха үедэ энэ зүжэгтэй зэргэ үшөө нэгэ хүүгэдтэ зорюулагдаhан зүжэг бага танхим соо табижа захалагдаа. Декабрт hара соо нэгэ дахин тиигэжэ уулзагдаа бэлэй, харин мүнөөдэр ээлжээтэ уулзалгамнай. Энэ удаа залуу гэр бүлэнүүдэй хүүгэдтэ Галсан Нанзатовай бэшэhэн «Тарган Замай ба Мангадхай тухай үльгэр» бага танхим соо (дүрбэдэхи дабхарта) дурадхагдана. Тиихэдэ театрай гол тайзан дээрэ театрай залуу артистнарай наададаг А. Чеховэй хоёр богони зүжэгүүд табигдаха. Иигэжэ гэр бүлөөрөө ехэ багагүй зүжэг хаража, сэдьхэлэйнгээ байдалые үргэжэ гараха арга алишье таладаа таатай гэжэ ойлгосотой.