Һарын литээр Шэнын нэгэн январиин 31-дэ тудалдажа, арадай hайндэр Сагаалган дэлхэй дээгүүр наярхань гээшэмнай шэнэ hонин бэшэ, арад түмэн ехэ багагүй бэлэдхэлтэй, сэдьхэл hэгшэнги хүлеэжэ байна.

Энэ үдэр Буряад ороной нютаг бүхэндэ, ниислэл хотодо hайндэрэй хэмжээ ябуулганууд үнгэрхэ, найр наадан дэлгэрхэ. Ганса Улаан-Үдын байдалаар абажа харахада, хотын театрнууд наадатай, зугаатайнууд, Совеэдүүдэй талмай дээрэ хамагай хабаадалгатай Ехэ Ёохор захалжа, газар дайдаар дэлгэрээд, нэгэ доро нэгэ ехэ ёохор болон аймаг нютагуудаар хүүехэ гэжэ хүлеэгдэнэ. Нёдондо жэлэй Ехэ Ёохорто нэгэ доро 3 000 хүн хабаадаа гэhэн мэдээсэл бии.  Хотын тэрэл түб талмай дээрэ ехэ наадан зарглагданхай, «Сагаан hара, амар мэндэ!» гэhэн зүжэглэмэл наадан, заншалта ёhоороо «Буузын баяр», юрэдөө Сагаалганай түрүүшын үдэр гэрhээ гаража ошоhон хүнэй шэхэнэй шэмэг, нюдэнэй хужар яhалал бии хэбэртэй. Үдэр, 14 саг 30 минутаhаа Гомбо Цыдынжапова нэрэмжэтэ Оперо болон балеэдэй   театр соо Сагаан hарын баярай суглаан, концерт-наадан дэлгэгдэхэ, Буряад театр Сагаалганайнгаа hайндэрэй «Мориной соло» гэhэн нааданай хүшэгэ үдэшын 18 саг 30 минутада нээхэ.

Февралиин нэгэндэ гэхэ юм гү, али Шэнын хоёрто дуун болон хатарай үндэhэн «Байгал» театр «Сагаалганайнгаа уулзалгануудта» харагшадаа хүлеэжэ абаха, тиихэдэ энэл үдэр Дээдэ-Онгостойдо Үбэр Байгалай арадуудай урданай hуудал байдалай үзэмжэ дэлгэгдэhэн газартахи Сагаан үбгэнэй буусада айлшад байха. Хэд бэ гэбэл, хүршэ Монгол ороной Өвлийн өвөг (Үбэлэй үбгэн) Цас охин (Саhан хүүхэн) хоёр арад зоноор уулзаха, амаршалха байна.

Хүндэтэ нүхэд, он жэлэй hэлгэлдээн хоорондуур наада зугаадаа үндэр сэдьхэлтэй, ерэхэ жэлдээ амжалтатай, жаргалтай ажаhуугыт даа!