Согсолбориин эхиндэ энэ ном бэлдэһэн мэдээжэ уран зохеолшо Николай Шабаев иигэжэ бэшэнэ:
Бүгэдэ Буряадай эблэрэлгын ехэ hайндэр боложо тодорhон 2016 оной «Алтаргана» нааданай «хүшэгэ нээлтын» тээ урдахана энэ ном мүндэлбэ. Арадайнгаа хуби заяанда, «Алтаргана» нааданда, нааданай удхада зорюулhан шүлэгүүдые анха удаа эблүүлжэ, гурбан ехэ гүрэнүүдэй дэбисхэр дээрэ ажаһуудаг буряадуудай хамтын согсолбори болгожо гаргаха бодолтой Буряад Уласай Соёлой яаманай cайд Тимур Цыбиковэй һанаашалгаар уряал табижа хандаhамнай, уран шүлэгшэд уряалыемнай олоороо тогтоон абаба.
Шүлэг бэшэдэг хүнүүд буряад арад соо айхабтар олон. Шүлэг гээшэ уран үгын агууехэ урлал. Уран шүлэгшэ гээшэ онсо бодолтой, харасатай, сэдьхэлэй эрилтээр зохёолнуудаа бүтээдэг тусгаар бэлигтэн, алишье сагта арад түмэн соо өөрын онсо һууритай хүн ха юм даа.
Алтан дэлхэйhээ халижа ошоhон аха үеын шүлэгшэдэй зохёолнуудые оруулалсаабди. Мэдээжэ ирагуу найрагшадһаа гадна һая бии боложо байhан шэнэ нэрэнүүд баhал олон. Түрүүшынгээ алхам хэжэ ябаhан шүлэгшэд хүнгэн бэшэ энэ харгы нэгэтэл шэлээ хадаа, сухарингүй ябажа, арад түмэндөө сэдьхэлээ нээжэ, арюун нангин хэрэгтэ, баатаршалгада уряалха шэдитэй шүлэг мүндэлүүлхэ эрмэлзэлыень энэ ном дэмжэхэ гэжэ этигэнэбди.
Гурбан ехэ гүрэнэй эрхэтэн боложо түрөөд, ондо ондоо орон нютагуудта урган тэнжэһэн гэхэдэшни, буряад лэ хадаа буряад сэдьхэлынь булин гаража, эдэ шүлэгшэдэй сэдьхэл нэгэн, нэгэ шэглэлтэй, нэгэ һанаатай гэжэ тон эли харагдана. Тиихэдээ бүхы буряад-монгол арад түмэндөө нэгэл адли найдал заяажа, арадаа нэгэл тээшэнь уряалжа дуулаһан шүлэгшэд гэжэ сэгнэхэ дүүрэн эрхэ бии болоно. Зай, иигээд лэ, гурбан оронойнгоо уран шүлэгшэдэй хамтын согсолбориин түрүүшын нюур hэхэжэ уншыт даа, хүндэтэ нүхэд, «Алтарганын» айлшад!
Алтаргана
Буряад арадай дуун
Ара газарта ургадаг
Аса бүхэтэй алтаргана.
Альган дээрээ тэнжээhэн
Аба эжы хоёрни.
Үбэр газарта ургадаг
Эшэ бүхэтэй алтаргана.
Үбэр дээрээ тэнжээhэн
Эжыл аба хоёрни.
Энэ ном бүтээһэн «Буряад-Монгол ном» хэблэл буряад хэлэ соёлдоо саг үргэлжэ һанаа зобожо дэлгэрүүлжэ ябадаг Дондогой Номин,
Цэбээнэй Долгоржаб, Доржын Галсандулма(үбэр-Монголой Шэнэхээн нютаг), Буряадай соёл спортын холбооной түрүүлэгшэ Бадамын
Доржпүрэв (Монгол Улас) гэдэг һайхан сэдьхэлтэй нүхэдтөө талархалаа элирхэйлнэ.
Тус ном «Буряад хэлэ Буряад Уласта cахин хамгаалжа, болбосоруулан хүгжөөхэ» гэһэн Буряад Уласай гүрэнэй хүтэлбэри хэрэгжүүлхэ
арга хэмжээнэй хүреэндэ БУ-ай Соёлой яаманай һанхүүгэй дэмжэлгээр хэблэгдэбэ.
Тус ном эндэһээ татажа абахала болоно.
