Энэ жэлдэ Сагаалган эртүүр тудаба. Хоёр һарын 9-дэ Гал Улаан Бишэн жэлэй шэнын нэгэнэй үдэр гэжэ тэмдэглэхэбди. Боди сагаан сэдьхэлээрээ жэнхэни һайндэрээ угтахаараал угтана бэзэбди. Зүгөөр Сагаан һарын үдэрнүүдэй найр наадануудшье наяржа захалха аабза. Тэрэ тоодо заншалта болоһон «Баатар, Дангина» мүрысөөн онсо һуурияа лаб лэ эзэлхэ. 2016 ондо «Баатар, Дангина» гэжэ гаршагтай наадан-мүрысөөмнай П. И. Чайковскийн нэрэмжэтэ дунда мэргэжэлэй урлалай һургуулида февралиин 28-29-дэ шэлэн абалгынгаа шатада хужарлагшадаа урина. Харин түгэсхэлэй ехэ тоглолто мартын 1-дэ Буряад театрта болохо.
Шэнэ жэлэй гарахаһаа 26-дахи удаагаа үнгэргэгдэхэеэ байһан харалган-мүрысөөндэ бэлдэлгэ хаа хаанагүй эхилбэ ёһотой. Имагтал энэ нааданда үргэн буряад ороноймнай хүбүүд, басагад эдэбхитэйгээр хабаадажа, эгээл эрхимүүдээ элирүүлхые оролдодог агша. Басагадта – гоо дангинын бэе шарайһаа, хүбүүдтэ –
бар бүхын хүсэнһөө гадуур сэсэн мэргэн үгэ, һүбэлгэн түргэн ухаан, урихан налгай һанаа бодолынь эндэ заатагүй хэрэгтэй болохо. Эдэ мэтэ абяас шадалаа эндэ тобойлгон харуулха шухалын шухала бшуу. Һорилго-мүлилгын хаһа нээгдэбэ. Хабаадагшадта хэн, хэнэй, хаанахишье һаань илгаагүй амжалта уридшалан хүсэе!
Мэнэ һаяхана Буряадай арадуудай уран бүтээлэй түбтэ хэблэлдэ бэлдэгдэжэ, нара хараһан «Уг гарбалаа сахия!» гэһэн ном «Баатар, Дангина» мүрысөөнэй түүхэдэ зорюулагдаа. «Жэлһээ жэлдэ мүрысөөн харагшадайнгаа дунда һайшаагдан, улам үндэр хэмжээндэ гаражал байна. Хабаадагшадшье эли тодо олошороо. Ааша маягыньшье һүүлэй үедэ эрид хубилаа», – гээд ном дотор хэлэгдэнэ.
