Наадануудай эхилжэ байһан үеэр, урда жэлнүүдтэ, Хүхюу буряад гээшэмнай хэн гээшэб гэһэн тайлбари үгөө бэлэйбди. Энэ хадаа hонин, худалшье гээ hаа худал, үнэншье гээ hаа үнэн, юрэдөөл үнэн худал хоёрой хоорондуур хөөрэлдэжэ байдаг хүнүүд Хүхюу буряадууд гээшэ ха гээ һэмди. Энэ ушарые анхан һанаашалжа, тайзан дээрэ гаргаха бодол Улаан-Үдын Захиргаанай Залуушуулай хэрэгүүдэй талаар хүтэлбэриин дарга Э. Ч. Дымчиковай ударидалга доро мүндэлжэ, ябан ошон замаа оложо, энэ мүнөө дүрбэдэхи удаагаа тайзан дээрээ гараба гээшэ.
Мүрысөөнэй эгээл дээдэ, Гран-при гэдэг эрхим шагналда Захааминай аймагай Дүтэлүүрэй һургуулиин 4-дэхи ангиин һурагша Сультим Гармаев «Лута үдэр» гэһэн хөөрөө дэлгэжэ хүртэбэ.
16 наһа хүрэтэр эрхим хөөрэгшэд сооһоо Зэдын аймагай Инзагатын Чимит-Доржо Ринчинов 1-дэхи шатын дипломдо,
Улаан-Үдын Вагжановай нэрэмжэтэ соёлой байшангай Алина Осорова 2-дохи шатын дипломдо,
Улаан-Үдын 54-дэхи һургуулиин Дашанима Андреев, тиихэдэ Эрдэни Матханов хоёр зэргэ 3-дахи шатын дипломуудта хүртөө.
16 наһанһаа 34 наһан хүрэтэр хөөрэгшэд сооһоо 1-дэхи шатын дипломдо хүртэһэн хүн үгы, харин 2-дохи шатын дипломдо Захааминай Санага тосхоной Олимпиада Цыренова хүртөө,
Гэрэлма Цыренова 3-дахи шатын дипломдо хүртэһэн байна.
34 наһанһаа дээшэ наһатан соо мүн лэ 1-дхи шатын дипломдо хүртэхэ хүн байбагүй, харин 2-дохи шатын дипломдо Яруунын аймагай Үлзытэ тосхоной Ринчин-Доржо Санданов хүртэбэ,
Захааминай Санага тосхоной Борис Тарбаев 3-дахи шатын дипломдо хүртөө.
Буряад хэлэн түрэл хэлэн бэшэ, гэбэшье энэ хэлэ һайнаар мэдэдэг хүнүүдэй дундаһаа 1-дэхи шатын дипломдо Хэжэнгын аймагай Дмитрий Пельменев,
Үбэр-Байгалай хизаарһаа ерэһэн Цырен Батоцыренов 2-дохи шатын дипломдо хүртөө,
Захааминай аймагай Никита Спицин 3-дахи шатын дипломдо хүртөө.
Зүжэглэмэл наадануудые харуулһан Зэдын аймагай Сагаатайн ехэшүүлэй бүлэг 1-дэхи шатын диплом абаба,
Ахын аймагай Бүрэнголой түлөөлэгшэд 2-дохи шатын диплом, тиихэдэ 3-дахи шатын хоёр диплом байгаа. Энэ дипломдо Загарайн аймагай Асагадай, Захааминай аймагай түлөөлэгшэд хүртэбэд.
Харагшадай һайшаалаар олдоһон шагналда Дмитрий Пельменев хүртөө.
Нааданай эмхидхэлшэд үзүүлһэн ехэ туһын түлөө Буряад Уласай Соёлой сайд Тимур Гомбожапович Цыбиков түрүүтэй яаманай алба хаагшадта баяр баясхалангаа элирхэйлнэд.
