Энэ удаа хүдэлмэриин бүлэг Буряад ороной дээдэ һургуулинуудай түлөөлэгшэдтэй уулзаба гэбэл: Зүүн-Сибиириин Гүрэнэй онол аргануудай болон хүтэлбэриин ехэ һургуулиин (ВСГУТУ), Буряадай Гүрэнэй ехэ һургулиин (БГУ), Буряадай Гүрэнэй Хүдөө ажахын ехэ һургуулиин (БГСХА), Зүүн-Сибиириин Гүрэнэй соёлой дээдэ һургуулиин (ВСГИК).
Хабаадагшад «Алтарганын» ехэ нааданда бужа ерэһэн олон түмэн айлшадые түбхинүүлхэ, энэ хэрэгтэ хүдэлэлсэхэ буряад хэлэтэй һайн дуратаниие шэлэжэ хүсээхэ талаар асуудалнуудые зүбшэһэн байна.
Тиихэдэ энэ уулзалгаһаа урид Буряад Уласай Соёлой яаманда аяншалга эрхилэгшэдэй, худалдаа наймаа ябуулагшадай түлөөлэгшэдтэй уулзалга үнгэрһэн байгаа. Эндэ энэ үедэ олошороод байһан аяншадай урда гараһан асуудалнуудые гуримшуулан шиидхэлгэ болон ехэ нааданай һүлдэ тэмдэгые худалдаанда табигдаһан эд хэрэгсэлнүүдтэ шадамар зохидоор хэрэглэлгэ тухай асуудалнууд гол һуурида табигдаһан юм.
Буряадай ниислэл хотодо 2016 оной «Алтаргана» ехэ наадые эмхи гуримтайгаар үнгэргэлгын асуудалнуудаар зүблөөнүүд хабаадаха гүрэн түрэ, можо нютагуудай түлөөлэгшэдтэй мүн лэ үнгэрөө бэлэй гэжэ һануулнабди. Нэрлэхэ болобол: Үбэр-Байгалай хизаар, Эрхүү можо, Хитадай Арад Уласай Дотор Монголой.
Хүлгөөн юрьеэн соогуураа мартажа байгшабта гэжэ ехэ нааданайнгаа болзор сагые үшөө дахин һануулая: энэ жэлэй долоон һарын 1-3-най үдэрнүүдтэ Улаан-Үдэ хотодо.
