Энэ ном иигээд лэ, «Алтан модоной баяр» гээд нэрлэгдэнхэй. Ном соо гурбан ехэ гүрэнүүдэй уран шүлэгшэд – 69 хүн оруулагдаа. Аха заха, ехэшүүлнай бии гэбэл: Николай Дамдинов, Даша Дамбаев, Дондог Улзытуев, Булад Жанчипов, Чимит-Рэгзэн Намжилов, Санджэ-Сурун Раднаева, Галина Базаржапова, Цырен-Дулма Дондогой болон бусад, Оросой Холбооной уран зохёолшод сооһоо залуу һүрэгтэйгөө дүшэ гаран шүлэгшэд байха. Эндэмнай багшанар, хүдөө ажахын, бусад һалбаринуудай мэргэжэлтэд, эрдэмтэд оролсоно, дээдэ гарай хирург-эмшэншье бии.
Хитад Уласай Шэнэхээн тоонтотой уран шүлэгшэд Халзайн Болод, Балдоржын Бадараа, Үлзыбаатарай Жалма, Санжайжабын Хандацырен, Наа Сэмжэд, Чоо Дугаржав болон бусад, 10 шахуу зохёолшод оролсобо ха.
Тиихэдэ Монгол оронһоо олон шүлэгшэд хабаадалсаба. Мэдээжэ Р. Чойном, тиигээд саашадаа Санжайжабын Хандацырен, Цэндийн Бадамдорж, Худай Сэдэнэй Намсарай, Тойсомой Галсан, Баатарай Галсансүх, Буряад орондо хэдэ хэдэн мүрысөөнүүдтэ хабаадлсажа мэдээжэ болоһон Болдын Батхүү болон бусад бии.
Үндэр наһатай ажалай ветеранууд – Агын тойрогой Шандали нютаг тоонтотой Дулмажапова Дулмадоржи, Сэлэнгын аймагай Ноёхон нютагай Биликтуева Долсон хоёрой зохёолнуудай энэ ном соомнай багтаһанда бидэ баяртайбди, бууралһаа үгэ дуула гэдэг гээбы.
Энэ номоо гурбан ехэ гүрэнүүдэй дэбисхэр дээрэ ажаһуудаг буряадуудай хамтын согсолбори болгожо гаргаха бодол Буряад Уласай Соёлой яаманай cайд Тимур Цыбиковэй hанаашалгаар гурбан ехэ гүрэнүүдэй уран шүлэгшэдэй энэ ном соо эблэрхые уряал табижа хандаhамнай, уран шүлэгшэд уряалыемнай тогтоон абажа оролсоо. Удангүй иигээд лэ гартаа абажа хараха сагнай ойротобо, уран шүлэгэй шэди ехэ бэлэй, уншагшын сэдьхэлдэ үндэр һайхан мэдэрэлнүүдые түрүүлжэ, буряад угсаатанай ажаһуудаг нютаг нугануудаар таран дэлгэрхын һайхан хойшолон заншал гуримуудаа, хэлэеэ, соёлоо хүгжөөхэ хэрэгтэмнай үнэхөөр үзэгдэһэй.
