Шүлэг бэшэдэг хүнүүд буряад арад соо айхабтар олон. «Алтаргана» нааданда, нааданай удхада зорюулhан шүлэгүүдые анха удаа эблүүлжэ, гурбан ехэ гүрэнүүдэй дэбисхэр дээрэ ажаһуудаг буряадуудай хамтын согсолбори болгожо гаргаха бодол Буряад Уласай Соёлой яаманай cайд Тимур Цыбиковэй hанаашалгаар гурбан ехэ гүрэнүүдэй уран шүлэгшэдэй энэ ном соо эблэрхые уряал табижа хандаhамнай, уран шүлэгшэд уряалыемнай тогтоон абажа оролсоо.
Гурбан ороной мэдээжэ уран шүлэгшэдһөө гадна олон соо һая бии боложо байhан шэнэ нэрэнүүд баhал олон. Түрүүшынгээ алхам хэжэ ябаhан шүлэгшэд, хаанаб даа нэгэ тээ, дэмжэгдэжэ байха, тэдэнэй зохёолнуудые үргэжэ, хүнгэн бэшэ энэ харгы нэгэтэл шэлээ хадаа, сухарингүй ябажа, арад түмэндөө сэдьхэлээ нээжэ, арюун нангин хэрэгтэ, hайн hайханда, баатаршалгада уряалха шэдитэй шүлэг гээшын мүндэлхэ эдидэ hуража, ойлгожо абаха эрмэлзэлынь иигэжэ дэмжэгдэнэ гээшэ ха юм даа.
Тиихэдэ алтан дэлхэйhээ халижа ошоhон аха үеын шүлэгшэдэй зохёолнуудые өөhэдөө бэдэрэлгэ хэжэ оруулалсаабди. Гурбан ехэ гүрэнүүдтэ мүндэлжэ, хоорондоо ондо ондоо орон нютагта урган тэнжэһэн гэхэдэшни, буряад лэ хадаа буряад сэдьхэлынь булин гаража, эдэ шүлэгшэдэй сэдьхэл нэгэн, нэгэ шэглэлтэй, нэгэ һанаатай гэжэ тон эли харагдана. Тиихэдээ бүхы буряад арад түмэндөө гансахан найдал заяажа, арадаа нэгэл тээшэ уряалжа дуулаһан шүлэгшэд гэжэ сэгнэхэ дүүрэн эрхэ бии болоно.
Уран шүлэгшэ гээшэмнай онсо бодолтой, онсо харасатай, сэдьхэлэй эрилтээр арадаа уряалжа зохёолнуудаа бүтээдэг тусагаар бэлигтэн, алишье сагта арад түмэн соо өөрын онсо һууритай хүн гэгдэдэг гээбы даа. Тиигээд лэ уран шүлэгшэдэйнгөө энэ номой түрүүшын нюур hэхэжэ, харыт даа, хүндэтэ нүхэд, «Алтарганын» зошод!
Энэ ушараар долоон һарын 3-да 14 сагһаа Буряад Уласай Үндэһэн номой санда номой нара хараһан ушараар нюур нээлгын баярай уулзалга болохо гэжэ дуулганабди. Хитад, Монгол, Орос гүрэнүүдтэ ажаһуудаг буряад шүлэгшэдэй энэ ушараар уулзажа, танилсажа, һанал бодолнуудаараа андалдажа тараха арга байна, үдэртөө сугларжа байдаггүй хадаа, энээхэн арга боломжые хэрэглэжэ, танилсажа тараял даа, хүндэтэ нүхэд.
