«Алтаргана» һайндэртэ зорюулһан энэ номтой танилсалга Үндэһэтэнэй номой сан соо боложо үнгэрбэ.70-аад авторай хабаадалгатай энэ согсолбориин түһэлэй ударидагша Жанна Дымчикова, харюусалгата редактор Николай Шабаев, согсологшод Виктория Найданова, Жанна Дымчикова, Батжаргалай Чинзориг, Николай Шабаев гэгшэд болоно. Уран шэмэглэлэй талаар редактор Дмитрий Гармаев.
Шэнэ номтой танилсалгын дүхэригтэ олониитын түлөөлэгшэд: багша Янжима Ивахинова, Монголһоо бууһан айлшад - худай омогой Сэдэнэй Намсарай, эвенк хушуунай Жимбаа аха, согсолбори соо ороһон поэдүүд Даша-Дондоб Очиров, Галина Раднаева, Галина Базаржапова, Нина Артугаева-Ленхобоева, Даша-Нима Халхаров, гуурһаяа туршан бэшэдэг Жаргал Цыдыпов, Долсон Цыремпилова, Вера Саганова, Дулмадоржи Дулмажапова, эхилэн бэшэгшэ Элбэг Зандраев болон бусад хабаадаба.
Гурбан ондоо ороной ирагуу найрагшадые багтааһан согсолбори буряад хэлэн дээрэ анха түрүүшынхиеэ хэблэгдэбэ гээшэ. Энэмнай нэрэ түрын, нэрэ хүндын хэрэг болоно. Арадай һайндэртэ зорюулагдаһан хадаа эхэ нютагаа, эхэ хэлэеэ үргэхэ, үндэһэтэнэй мэдэрэл бадаруулха, зонойнгоо хии мориие, һүр һүлдые үргэхэ гэһэн удхатай шүлэгүүд гол түлэб толилогдоо. Шэглэл нэгэтэй, урасхал нэгэтэй зохёолнууд хүнэй досоо һайн һайханай мэдэрэл түрүүлнэ. Монголой, Үбэр-Монголой буряадуудай шүлэгүүд номдо онсо маяг, онсо уянга, удха оруулна. Дам саашадаа буряадһаа монголдо, монголһоо буряадта оршуулгада онсо анхарха, энэ хэрэгые мүнгөөр һомолхо хэрэгтэй. Тиихэдээ Буряад-Монгол Ном хэблэлэй анханайнь заншаһан хэб сахигдаа гэхэ гү, али шэмэглэлынь танюуһатай, нэгэ гарай гээд эли. Мүнөө үеын бүтээлэй үзэсхэлэн шэнжэтэй. Гадар таладань алтарганын юрэл зураг буулгабари бэшэ, харин түхэл дүүрэн графикын ёһоор, һүлдэ тэмдэг мэтээр үгэнхэй. Үзэгэйнь хэб нюдэндэ урин, зохид. Гэбэшье, дам саашадаа энэ номоо бүри баяжуулан, шэнээр хэблэхэ гэбэл, авторнуудаа үшөө наринаар шэлэхэ, алдагдаһан нэрэнүүдые оруулха хэрэгтэй, - гэһэн ажаглалтаяа поэт, журналист Галина Базаржапова-Дашеева хэлэбэ.
Сугларагшад ном согсолон бүридхэһэн бүлэгэйхидтэ үнэн сэдьхэлэй баяраа хүргэбэ.
