Харалга нээлгын баяр ёһололдо Оросой Нэгэдэлэй Суглаанай Буряад Уласһаа Нэгэдэлэй Зүблэлэй гэшүүн, профессор, Оросой эрдэмэй Академиин гэшүүн-корреспондент А. К. Тулохонов, Буряад Уласай Ажахы эрхилэлгын яаманай аяншалгын талаар хорооной түрүүлэгшэ Б. Ц. Цыдыпова, Буряад Уласай Соёлой яаманай ажахы эрхилэлгын ба эмхидхэл хангалгын хорооной түрүүлэгшын орлогшо Е. В. Эрдынеев, Оросой Гүрэнэй арадай уран бэлигэй Байшангай уран зурагай ба уран барималай урлалай таһагые даагша, Оросой Холбооной Засаг Газарай соёлой талаар шагналда хүртэгшэ, урлал шэнжэлгын эрдэмэй кандидат Ю. Б. Иванова гэгшэд хабаадаа.
Энэ харалгада Монгол, Хитад оронуудһаа, Эрхүү можоһоо, Үбэр-Байгалай хизаарһаа болон Буряад оронһоо 70 гаран дархашуул хабаадабад. Уран барималай урлалаар дарханай тон лэ өөрынгөө сэдьхэлээр байгуулһан бүтээлнүүд, тиихэдэ байгаалида хоро хүргэхэгүй ба байгаалиһаа хорото бодосуудые оруулаагүй бүтээлнүүд табигдаа. Харалгын үедэ түмэр дабтажа, зөөлэн түмэр сохижо, мүнгөөр урлажа, модо һиилэжэ, мүн тиихэдэ нэхэжэ бүтээхэ аргануудые харуулха, ойлгуулха хэшээлнүүд үнгэргэгдөө.
– Эндэ би гайхалтай гоё бүтээлнүүдые харабаб. Дархан гоё һайхан гээшые дээдэ хэмжээндэ ойлгодог байна. Эжыдээ мүнгөөр бүтээгдэһэн уран бүтээл үнинэй бэдэрдэг һэм, эндэл олохо бэшэ аа гүб, – гэжэ харалгада ерэһэн Ольга хэлэбэ.
Бэдэрһэн хүнэй саг алмажа, бэдэрхэдэ хүнгэн болгожо, арадай уран бэлигэй түб эндэ дэлгэгдэһэн уран бүтээлнүүдые нэрлэһэн тусхай данса хэблэжэ гаргаһан байгаа.
– Энэ данса соо дархашуулай 120 хүдэлмэри оруулагдаа, – гэжэ улас түрын арадай уран бэлигэй түбэй захирал Жаргалма Анзановна Архинчеева, тиихэдэ энэ данса бүридхэн байгуулһан Саржана ДашинимаевнаЭрдынеева хоёр ойлгуулбад.
Эндэ гансашье харалга дэлгэгдээ бэшэ, мүн Буряадай Дуури бүжэгэй театрай зүжэгшэд Дамба Занданов, Баатар Будаев, Мэргэн Санданов гэгшэдэй, мүн тиихэдэ Улаанбаатар хотын дунда мэргэжэлэй хүгжэм-бүжэгэй һургуули дүүргэжэ гараһан Гончигсумлаагай, Монгол Уласай Урлалай Ехэ һургулиин оюутан Зандан Шойдоковой, «Буряадай зэндэмэни» гэһэн хатарай шуулгын, «Дээдэ-Үдын һуурин» гэһэн арадай аман зохёолой шуулгын, «Забава» гэжэ арадай хүгжэмэй болон хатарай театрай, Буряадай Гүрэнэй циркын хабаадалгатай ехэ тоглолто үнгэрөө.
