Энэ хэмжээ ябуулганууд шэнээр арамнайлагдажа байһан нангин Пётр Павел хоёрой һүмэ соо үглөөнэй уншалгаар эхилээ. Буряад Уласай Соёлой яаманай дэмжэлгээр уран зохёолшын нэрэмжэтэ уран зохёолой музей һэльбэгдэжэ, тэрэнэй нээлгэ һүмэ соохи уншалгын удаа үнгэрбэ.
Нютагайнгаа агууехэ хүбүүнэй дурасхаал ёһолжо, Мухар-Шэбэрэй аймагайхид Байгал-Шадарай аймагһаа Шаралдай хүрэтэр автоунаагаар ябалганда хабаадаа. Энэ һайндэр арадай уран бэлигтэнэй тоглолтонуудаар, арадай сэнгэлгээр шэмэглэгдээ, тэдэнь үдэрэй туршада боложо үнгэрһэн байна.
«Хэдэн зуун жэлнүүдээр үргэлжэлхэ урлал» гэһэн сэдэбээр улас түрын хэмжээнэй сээжэ бэшэлгэ зарлагдаһан байжа, тэндэ ехэ олон хүдэлмэринүүд ороо. Эндэ хэмжээ ябуулгые эмхидхэжэ байһан Мухар-Шэбэрэй аймагһаа гадна, Зэдын, Ивалгын, Байгал-Шадарай, Кабанскын, Бэшүүрэй аймагуудай, тиихэдэ Улаан-Үдэ хотын һургуулинууд хабаадаба.
Тиигэжэ эндэ шалгаржа, шангай һууринуудые эзэлбэ гэжэ нэрлэхэдэ:
нэгэдэхи һуурида Байгал-Шадарай аймагай Гремячинскын дунда һургуулиин 10-дахи ангин һурагша Наталья Лапина;
хоёрдохи һуурида Хяагтын 3-дахи дунда һургуулиин 9-дэхи ангин һурагша Андрей Цыбденов;
гурбадахи һуурида Бэшүүрэй 1-дэхи дунда һургуулиин 9-дэхи ангин һурагша Александр Слепнёв.
Дээрэ нэрлэгдэһэн хүдэлмэринүүдые нэрэтэй түрэтэй шүүлгын бүлэг сэгнэһэн, тэрэ бүлэгтэ энэ нютагһаа гарбалтай сенатор А. Г. Варфоломеев, Соёлой яаманай сайд Т. Г. Цыбиков, Зүүн-Сибиириин соёлой дээдэ һургуулиин багша Н. Д. Хосомоев, Буряад Уласай үндэһэн номой сангай захирал Л. В. Гармаева, И. Калашниковай нэрэмжэтэ номой сангай захирал Р. Ц. Цыбенова, Соёлой яаманай таһагые даагша Б. Т. Айсуева, Буряадай үндэһэн номой сангай таһагые даагша Д. В. Базарова гэгшэд оролсоо.
Энээнһээ гадна уран һайханай тоглолтонууд баһал мүрысөөнэй гуримаар үнгэржэ байна, баяр ёһололой эсэс тээшэ дүнгүүд согсологдохо ёһотой.
