Театрай хаһа нээхэ гээшэ эгээл харюусалгатай хэмжээ ябуулгануудай нэгэн байдаг. Түрэл театртайгаа уулзахаяа яарашоод байһан харагшадайнгаа этигэл найдалые харюулха хаһа эхилхэнь гээшэ гү гэжэ эндэл элирхэ. Театрай хаһын туршада үнгэрһэн хаһануудта табигдаһан ямар хүдэлмэринүүдтээ эрьен, дахинаа тайзан дээрээ харуулхаб, тиихэдэ шэнэ һонин юугээр харагшадаа гайхуулха, сэдьхэлыень ханааха байһан мүн лэ энэ үедэ тодорхойлогдоно ха юм.
Театрайнгаа ээлжээтэ, 77-дохи, хаһые нээхэ бэлэдхэлдээ дээрэ нэрлэгдэһэн Дуури бүжэгэймнай театр оробо, тиихэдээ августын үлэһэн үдэрнүүд болон сентябрь һара соо болохо хэмжээ ябуулганууд тухайгаа мэдээсэл дуулгаба. Тиигэжэ сентябриин 3-най 17:00 сагта Улаан-Үдэ Ямагата хотонуудай хоорондын андын харилсаанай тогтоогдоһоор 25 жэлэй ойн баярта зорюулагдаһан тоглолто болохо юм ха. Театрай бүжэгэй талаар уран һайханай хүтэлбэрилэгшэ Морихиро Ивата Наран зүгэй орон түбиин заншал гуримуудтай манай харагшадые танилсуулгаяа үргэлжэлүүлжэ байна. Энэ удаа дээрэ нэрлэгдэһэн ойн баярһаа гадна Улаан-Үдын 350 жэлэй ойдо энэ тоглолтонь мүн лэ зорюулагдана. «Бадма сэсэг» гэжэ зүүн зүгэй хатарнуудые гүйсэдхэдэг арадай шуулга, буряад арадай хүгжэмэй зэмсэгүүдэй щуулга, тиихэдэ Японой «Таишин» гэжэ хэнгэргэнүүдэй шуулга хабаадаха, хоёр ороной үндэһэн эдеэ хоолой зүйлнүүд харагшадай амталжа туршахын тухайтай дэлгэгдэхэ, хоёр хотонуудай Толгойлогшонор, Хабаровск хотодо байдаг Япон гүрэнэй юрэнхы элшэн сайд болон бусад тушаалта нюурнууд хабаадаха гээд хүлеэгдэнэ.
Энээнэй һүүлээр, сентябриин 22-то 18:30 сагһаа Ленинэй орденто СССР-эй арадай зүжэгшэн Гомбо Цыдынжаповай нэрэмжэтэ Дуури бүжэгэй театрай ээлжээтэ 77-дохи хаһын нээлгэ болохо гэнэ. Энэ үдэшэ Дж. Пуччиниин «Тоска» шэнэ хаһын хүшэгэ нээхэ болоо. (Юрий Лаптевай найруулгаар). Театрай дуушадай эли гарама бэлиг, зүжэгэй гайхалтай һайнаар тааруулһан хубсаһан, тайзанай шэмэглэл, хүгжэм – эдэ бүгэдэ хамтаран ниилэхэдээ харагшын сэдьхэлдэ шэнгэһэн, бүгэдэндэ дурлуулһан энэ зүжэг урагшатай хаһын эхи табиһай гэһэн хүсэл байна. Сентябриин 22-ой үдэшэ Каварадоссиин партиие Буряадайнгаа харагшадта дурлуулһан Михаил Пирогов, Скарпиа боложо Буряадай габьяата зүжэгшэн, П. Чайковскийн нэрэмжэтэ урилдаанай дээдэ шагналтан Ариунбаатарын Ганбаатар гэгшэд дуулаха гээд хүлеэгдэнэ.
Тиихэдэ сентябриин 24-дэ энэл «Тоска» зүжэгтэ хабаадаһан бүлэгэй табиһан Ж. Бизегэй «Кармен» зүжэг дурадхагдана. Энэ үдэшэ эндэ ерэһэн харагшад Мэргэн Санданов, Оксана Хингеева, Намхайн Мөнхзул, Аюна Базаргуруева гэгшэдые хаража шагнаха байха.
Тииһээр саашадаа ямар зүжэгүүд, ямар тоглолтонууд болохоб гэжэ зар тунхагууд хэлэхэ юм бэзэ, адаглажа байгаарайт.
