Үльгэрэй орон руу хүшэгэ нээгдэжэ, «Puppet party» гэжэ шэдитэ һайндэрөөр бишыхан харагшад түрэл театрайнгаа шэнэ хаһа нээхэ. Энэ һайндэр театрай талмай дээрэ 10 сагһаа эхилжэ, театрай танхим соо үргэлжэлхэ юм.
Ойн баярай энэ хаһа шэнэ зүжэгүүдһээ захалаад, бусад олон һонирхолтой хэмжээ ябуулгануудаар баян байха. Юһэн һарын 11-дэ Красноярск хотодо Оросой Холбооной хэмжээндэ түрүүшынхиеэ эмхидхэгдэжэ байһан «Дэлхэйн хэлэнүүд» гэһэн ехэ нааданда хабаадалсажа ерээд, 26-28-най үдэрнүүдтэ «Үльгэр» театр Зэдын аймаг гаража, харагшадтайгаа уулзалгануудые үнгэргэхэ түсэбтэй.
Урда жэлнүүдтэ табигдажа байһан «Бүхы хулгананууд хуруудта дуратай», «Хамар-хүн» гэһэн зүжэгүүд шэнээр һэргээгдэжэ энэ хаһын туршада тайзан дээрэ табигдаха. Арбан һарын 22-23-да Буряадай хүүгэдэй театрай студинуудай «Зархайн шэдитэ үльгэрнүүд» гэһэн мүрысөөн баһал заншалта ёһоороо үнгэрхэ, ерэхэ Шэнэ жэлэй шэдитэ үдэрнүүд, үдэшэнүүд мүн лэ һонирхолтой гоёор, шэдитэ хэмжээ ябуулгануудаар, зүжэгүүдээр шэмэглэгдэхэ байха.
«Үльгэр-наадан» гэһэн сүлөө саг соёлой талаар үнгэргэлгын түб таанараа баһал хүлеэжэ байна.
