Саг үргэлжэ харагшын айхабтар ехэ анхарал эзэлэнгүй, нээгдэхэ сагтаа нээгдээд, хаагдаха сагтаа хаагдаад байдаг кассые юрэ бусаар, баярай оршондо нээхэ гэжэ шиидэһэн театр энээнтэй дашарамдуулагдаһан олон һонирхолтой хэмжээ ябуулагнуудые хараалба. Бэлэгүүд байха, билеэдүүдэй үнэ сэн горитой хүнгэлэлтэдэ орохо, театрай зүжэгшэдэй хүсөөр тоглолто болохо.
Хүнгэлэлтэтэй биледүүд түрүүшынхиеэ табигдажа байһан «Осенний марафон» гэжэ зүжэгтэ, «Һүни театр соо» гэһэн хэмжээ ябуулгада, театрай хаһын туршада ябажа байха бусад тоглолтонууд болон зүжэгүүдтэ байха гэнэ.
«Осенний марафон» гэжэ зүжэгтэ биледүүдые абаһан түрүүшын 10 хүндэ найруулагшын болон зүжэгшэдэй гар табилгатай афишанууд барюулагдаха.
Тиигээд юһэн һарын 23-24-дэ, хоёр үдэрэй туршада, Александр Володинай зохёолоор Сергей Левицкийн табиһан «Осенний марафон» гэжэ зүжэгөөр ээлжээтэ 88-дахи театрай хаһа нээгдэхэ.
«Һүни театр соо» гэһэн энэ театрта түрүүшынхиеэ үнгэрхэ хэмжээ ябуулгада орохо биледэй сэн 200 түхэриг хүнгэлэлтэтэй байха юм ха. Тэрэ «Һүнимнай…» арбан хоёр һарын 22-то гэжэ театрай түсэбтэ оронхой.
Театрай талмай дээрэ үнгэрхэ тоглолтодо зүжэгүүдһээ хэһэгүүд, бэшэшье шүлэглэмэл болон хүгжэмтэ хэһэгүүд орохо, юрэдөө ехэл һонирхолтой хэмжээ ябуулга боложо үнгэрхөөр хүлеэгдэнэ, ерэхэл гүбди даа.
