Ф. Достоевскийн (өөрынгөө намтар дээрэ үндэһэлэн бэшэһэн гэдэг) зохёолые Владимир Бочаров «Наадан» гэжэ нэрлээд, зүжэгэй хэлэндэ оруулжа, найруулан табина, бэлэдхэлэй хүдэлмэринүүд эхилэнхэй. Эндэ Москвагай залуу хатар найруулагша Мария Сиукаева (Хойто-Осетиһээ гарбалтай хүн) зүжэг найруулгада хабаадалсана, хүгжэмыень Монгол ороной Баатарын Батзориг, Буряад театрай Дахалэ Жамбалов, Сойжин Жамбалова гэгшэд бэшэжэ шэмэглэнэ. Зүжэгэй гол дүрые Оросой Холбооной габьяата зүжэгшэн Дарима Сангажапова байгуулна.
Театрай уран һайханай хүтэлбэри энээхэн «Наадан» гэжэ зүжэгһөө гадуур харагшадтаа тайзанай олон һонирхолтой хэмжээ ябуулгануудые энэ хаһадаа харааланхай.
Тиихэдэ үндэһэн театрнууд хоорондын уласхоорондын «Алтан сэргэ» гэжэ ээлжээтэ III ехэ наадан энэл намартаа боложо үнгэрхөөр хүлеэгдэнэ. Энэ жэлэй ехэ наадан Улаан-Үдэ хотын эхин һуури табигдаһан үеһөө хойшо үнгэрһэн 350 жэлэй ойн баярта зорюулагдана.
Буряад театрай уран һайханай хүтэлбэрилэгшэ Эржена Жамбаловагай мэдүүлһээр, энэ үедөө үндэһэн театрнуудай хүгжэлтын шэглэлнүүд ямар гээшэб гэжэ шэнжэлэн хараха зорилго табигдаһан юм байха. Оросой Холбооной дэбисхэр дээрэ ажалаа ябуулжа байдаг үндэһэн театрнуудта юун дуталданаб, тэдэ театрнууд ямар арга боломжонуудтайб гэжэ мэдээжэ, гэбэшье энэ асуудалнуудые шиидхэлгэдэ үшөөл «зүб талаһаань» хандажа үзэгдөөгүй байһаар.
Ехэ наадан табан үдэрэй туршада үнгэрхэ, эндэ манай театрһаа гадна Оросой Холбооной, мүн дүтын хари ороной өөрсэ маягтай үндэһэн зургаан театрнууд мүрысөөнэй гуримаар хабаадаха гэбэл: «Читиген», Топановай нэрэмжэтэ Хакасс театрнууд, «R.A.A.A.M» гэһэн Эстон театр, Монголой Нацагдоржын нэрэмжэтэ театр, Мажит Гафуриин нэрэмжэтэ Башкир театр, Дотор Монголой Ордос хотоһоо монгол зүжэгшэдэй нэгэдэл.
Тиихэдэ ехэ нааданай туг доро һаналаа хубаалдалгын талмайнууд байгуулагдажа, театрай мэдээжэ найруулагшадай зүжэгүүд, тэдэниие шүүмжэлгэнүүд эмхидхэгдэхэ. Эндэ Санкт-Петербургын Дмитрий Егоров Геннадий Тростянецкий хоёр ехэ нааданай ябажа байха үедэ тэрэ хаража шүүмжэлхэ зүжэгүүдые гол түлэб удхыень харуулжа байгуулха юм ха, байн тэдэнь манай тайзан дээрэ (шүүмжэлэл юу харуулнаб) табигдахадааш болохо.
