Энэ зүблөөн дээрэ Буряад Уласай Соёлой сайд Тимур Цыбиков дэлгэрэнгы элидхэл хээ. Элидхэл шагнаад байхадаа Буряад Уласай Толгойлогшо-Буряад Уласай Засаг Газарай Түрүүлэгшэ Вячеслав Наговицын өөрынгөө ажаглалтанууд, энэ асуудалаар Засаг Газарай хэһэн бүтээһэн ба хэжэ байһан ажал хүдэлмэринүүд, зарим тэды дүтын хараа түсэбүүд тущаа, Буряадай соёлой хүтэлбэридэ сэгнэлтэ үгэн, хөөрэжэ үгэбэ. Тиихэдээ гансашье соёлой талаар бэшэ, мүн бусад һалбаринууд яажа ажалаа ябуулжа байна гээшэб гэжэ танилсуулаа.
Энэ зүблөөн бүхыдөө 2007-2015 онуудай туршада бэелүүлэгдэхээр абтаһан уласай ниитэ ба ажахы хүгжөөлгын хараа түсэбүүдэй дүүргэлтэ ямар хэмжээндэ бэелүүлэгдээб гэжэ харагдаһан байна.
Сайдай хэһэн элидхэлэй гол удха гэбэл, Буряадай арад түмэниие соёлой болон урлалай ажал ябуулагшадай талаһаа хангалга яһала үндэр хэмжээндэ байгаа гэжэ ойлгогдобо, үнэндөө соёл, урлалшадай гол үүргэ энэл ха юм даа.
Тиихэдээ соёлой болон урлалай ажал ябуулгада гүрэнэй талаһаа анхарал яһала хандуулагдажа байгаа юм байха. Тимур Цыбиковэй элидхэл соо Оросой Холбооной Засаг Газарай талаһаа һайн үндэһэтэй, ерээдүйн лаб һууритай хэдэн олон түлэбүүд дурадхагдаа, «Түб-можо нютаг» гэһэн харилсаанай шэнэ олон жэлэй шэглэлнүүд байгуулагдаа.
Соёлой хүдэлмэрилэгшэдэй салин хүлһэнэй хэмжүүр 2008-2015 онуудай туршада 2,5 дахинһаа халта үлүү дээшэлээ, тиихэдээ дунда зэргээр 20 148 түхэригтэ хүрөөд байна гэжэ тэмдэглэгдэбэ. Энэнь 2008 ондо дунда зэргээр 7 563 түхэриг байһан гэнэ. Соёлшодой салин хүлһэ тэдэнэй ажаһуужа, ажаллажа байһан можо, нютагуудай ажахын дунда зэргын салингай хэмжүүртэ хүргэхэ гэһэн Оросой Холбооной Юрэнхылэгшын май һарын Зарлиг иигэжэ хүсэндөө хүрэжэ байна гэжэ хэлэгдээ. 2018 ондо соёл, урлалай ба гэгээрэл, болбосоролой хүдэлмэрилэгшэдэй салин нэгэ хэмжээндэ тэгшэрхэ гэжэ мэдээсэгдэбэ.
Буряадай соёлой гуламтанууд байра байдалайнгаа талаар яһала хангагданхай, хаана ямар дутагдалнууд байнаб, тэдэ мүнөө усадхагдажа байна, шэнэ байшан гэрнүүдшье баригдана, энэ талаар ажал саашадаа ябуулагдажа, хабщуу, хашалдаһан газарнуудта анхарал хандуулагдажа, байдал улам һайжарха ёһотой.
Байрын гэрнүүд гэжэ хүндүүлхэй асуудал яажа шиидхэжэ болохоб гэһэн арга боломжонууд, энэ асуудалда гүрэнэй талаһаа анхарал орхигдохогүй гэһэн мэдээсэл абтаба. Залуушуулай хамтын барилганууд гэжэ нэгэ арга боломжонь байна, эндэ гүрэн 20 хубииень өөр дээрээ абаха, тиихэдэ байрын гэрнүүдэй дотор, гадар хэрэгсэлнүүд болон түхеэрэлгэнүүдэй гаргашын 30 хуби баһал гүрэн өөр дээрээ абажа болохо байһанаа мэдүүлбэ.
Энэ зүблөөн энэ зундаа үнгэрһэн «Алтаргана» ехэ нааданда амжалтатай хабаадаһан хүнүүдтэ Баярай бэшэгүүдые барюулалгаар дүүрээ. Тиихэдэ Буряад оронойнгоо үмэнэ онсо габьяатай Ж. Ч. Дымчикова Б. В. Жалцанова хоёрто Буряад Уласай Засаг Газарай үбсүүнэй тэмдэгүүд барюулагдаба.
