Хакасуудай энэ ябадалай удаа манай театр дахинаа, хоорондынгоо харилсаануудые бэхижүүлэн, Хакас Уласаар ябажа ерэхэ түсэбтэй.
Юһэн һарын 8-да 12:00 сагта, 9-дэ 10:00; 12:00 сагуудта, 10-да 12:00 сагта М. Лермонтовэй нэрэмжэтэ ород драмын театр Улаан-Үдын эдир харагшадта «Мадагаскар» гэһэн үльгэр дурадхана. Сэнхир дэлгэстэ табигдажа мэдээжэ болоһон дүрэнүүдые тайзан дээрэ айхабтар томо хүүхэлдэйнүүд болгожо гаргаад, эдир харагшадтаа һонирхолтой аяншалга дурадхаха юм. Дэлгэстэ харуулагдадаг амитадтай тохёолдоһон ушаралта ябадалнууд, хүхюу зугаа наадан энэ зүжэг соо элбэгээр дурадхагдаха гэнэ.
Юһэн һарын 8-най 19:00 сагта манай Буряадай харагшадта мэдээжэ Василий Сигарёвой (Буряад театрай тайзан дээрэ табигдаһан «Нормандиин үхин», үгышье һаа «Зүһэниинь харашье һаа, зүрхэниинь улаан») зохёолоор табигдаһан «Детектор лжи» («Худалшаниие элирүүлхэ оньһон түхеэрэлгэ») гэһэн зүжэг табигдана. Энэнь үнэн сэхэ инаг дуран, жүтөөрхэлгэ,.. тиихэдээ тон һанаамгай гэһэн ойлгосонуудые багтааһан энеэдэнэй зүжэг болоһон гэнэ.
Юһэн һарын 9-нэй 19:00, 10-най 18:00 сагта Алексей Казанцевай «Старый дом» («Хуушан гэр») гэһэн зүжэг Улаан-Үдын харагшадта дурадхагдана. Энэ зүжэгые Оросой Холбооной, мүн хүршэ оронуудай 70 гаран театрнуудай тайзан мэдэхэ болоһон. Эндэ һургуулиин аха ангин Олег Саша хоёр һурагшадай эхин дуранай, мүн хахасалгын «түүхэ» зураглагдана юм ха, доторой байдал болон оршон хүсэнүүдэй зүришэлдөөнүүд, хүнэй һэшхэлэй байдал гээшые зүжэгшэд үнэншэмэ тодоор байгуулжа наадаһан байна.
Өөртөө, энэ оршондо өөрын хамаадалда зүб сэгнэлтэнүүдые үгэхэ гээшэ тиимэшье хүнгэн бэшэ байдаг гээбы даа…
М. Ю. Лермонтовэй нэрэмжэтэ ород драмын театр 1939 онһоо намтараа тоолоно. Тиихэдэ Воткинск хотоһоо драмын театрай зүжэгшэд Абакан ерэһэн байгаа.
