Мүнөө жэл соносхогдоһон мүрысөөн хоёр ехэ ойн баярнуудаар тудалдаа – Улаан-Үдын 350, тиихэдэ Буряадай арадай уран зохёолшо И. Калашниковай түрэһөөр 85 жэлэй ойгоор. Эндэ илажа тодорһон уран зохёолшодые нэрлэбэл, буряад хэлэн дээрэ ном боложо хэблэгдэһэн «Эхын захяа» гэжэ туужаһаа болон хэдэн үгүүлэлнүүдһээ бүридэһэн ажалайнгаа түлөө Доржо Сультимов, тиихэдэ ород хэлэн дээрэ «Танец орла» («Бүргэд хатар») гэжэ үгүүлэлнүүдэй ном хэблүүлжэ гаргаһанай түлөө Булат Молонов (нюуса нэрэнь Мобу).
Хэлэ бэшэгэй эрдэмэй доктор Елизавета Балданмаксаровагай һанамжаар Оросой Холбооной габьяата зүжэгшэн, буряад орондоо, Монголооршье мэдээжэ болоһон уран зохёолшо Доржо Сультимов зохёол бэшэлгынгээ ээлжээтэ шатада гараад ябана. Урдандаа хүүгэдтэ зорюулһан үгүүлэлнүүдые, зүжэгүүдые бэшэдэг байгаа, тэдэ зүжэгүүдынь Буряад театрай тайзан дээрэ табигдажа байгаа. Мүнөө томо захатануудта орожо, тэдээн соогоо хүнүүдэй һанаа зобоодог асуудалнуудта, заншал гуримуудаа сахилгада, хангай, байгаалияа хамгаалгада хандана гэжэ «Байгал» сэтгүүл 2015 онойнгоо зургаадахи дугаарта бэшэһэн байха юм.
«Энэ мүрысөөндэ шагнал хараалһан хотын захиргаанда, мини зохёол уншаһан шүүлгын бүлэгтэ, бусад уншагшадтаа баярые хүргэнэб. Зохёол соо ороһон ушар байдалнуудые тойронхи ажабайдалһаань лэ абадагби. Хүнүүдэй, түрэлэй харилсаанууд урдынхи мэтэ тиимэ дүтэ бэшэ болоо, энэ ушар минии һанаа зобооно» – гэжэ автор хэлэнэ.
Булат Молонов 1977 ондо түрэһэн, Буряадай Гүрэнэй Ехэ һургуулиин тоо бодолгын таһаг дүүргэһэн, удаань Улаан-Баатар хотын буддын шажанай ехэ һургуулида һураа. И. Калашниковай нэрэмжэтэ мүрысөөнэй шүүлгын бүлэгэй гэшүүн, «Байкал» сэтгүүлэй редактор Булад Аюшеев: «Энэ Булат Молоновай «Бүргэд хатар» гэжэ ном хубилган шэнэдхэлгын үедэ мүндэлөөд, мүнөө эгээл 30-40 наһандаа ябаһан хүнүүдые уран зохёолдо харуулха үүргэ дүүргэнэ. Эдэ зон гүрэн түрын үндэһөөрөө хубилжа байһан үеын хүшэр зам гаталаа. Хүдөөдэ ажаһуудаг буряадууд, залуушуул тухай. Тэдэ айхабтар хүндэ ажабайдалда байгаа. Энэ зохёол соо зүб лэ асуудалнууд табигданал даа – гэр, бүлэ, эхэ орон, тосхон, хэлэн…» – гэжэ хэлэнэ.
