Ородой Холбоото Уласай болон Монголой соёлой габьяата хүдэлмэрилэгшэ, Буряад Уласай арадай артист, соёл болон эрдэмэй Петровско академиин академик, Ородой Холбоото Уласай сэтгүүлшэдэй холбооной гэшүүн, бүхэроссиин мүрысөөнүүдэй лауреат Гунзэн-Норбо Гунзынов бүхы наһаараа түрэл хэлэе, соёлоо, ёһо заншалаа сахин хүгжөөхэ талаар ажал ябуулһан юм.
Гунзэн-Норбо Цыренович 1938 ондо Хэжэнгэ аймагай Хөөрхэ нютагта түрэһэн намтартай. Буряад-Монголой залуушуул болон оюутадай фестивальда «Адуушан» гэһэн хатар гүйсэдхэжэ, тэрэ харагшадай дура буляажа шадаа. Ташкентын хатарай училищи дүүргэһэнэй удаа, Гунзэн-Норбо Гунзынов 1968 он болотор Буряадай оперо болон баледэй театрта хүдэлһэн юм. Ехээр гэмэлтэһэнэй удаа бэлигтэй хатаршан баледээ орхиһон байна.
Саашадаа Гунзэн-Норбо Гунзынов багшын мэргэжэлтэй болоо, М.Н. Хангаловай нэрэмжэтэ музейн захиралаар, Буряад Уласай музейнүүдэй нэгэдэлэй захиралай орлогшоор хүдэлөө. Зүүн зүгэй Сибириин соёл болон уралигай академиин эрдэмэй-шэнжэлэлгын һалбариин даргын тушаалда байхадаа, фольклористика, этнографи хүгжөөлгэдэ горитой хубитаяа оруулааһэн. Гүрэнэй «Бурятия» телерадиокомпаниин программануудай хүтэлэгшэ, хүтэлбэрилэгшээр хүдэлхэ үедөө Гунзэн-Норбо Гунзынов Буряад, Монгол уласуудай арадай зохёохы ажал тухай һонирхолтой дамжуулгануудые бэлдэгшэ һэн. Тиихэдэ Гунзэн-Норбо Цыренович Улаан-Баатарай Буддын шажанай семинарида һуража гараһан намтартай.
Гунзэн-Норбо Гунзыновай дурасхаалда зорюулагдаһан тоглолтодо Буряад Уласай зохёохы бүлэгүүд, зүжэгшэд, дуушад, хатаршад хабаадаха.
