Тэрэ гэһээр аяар 38 жэл үнгэргэжэ, Буряадай Уран зураашад түрүүшынгээ ехэ хурал юһэн һарын 9-дэ зарлаһан байна. Энэ эмхиин эгээл түрүүн байгуулагдахада тэрэнэй түрүүшын түрүүлэгшээр Георгий Павлов һунгагдаа, харюусалгата секретариин тушаалда – Роман Мэрдыгеев. Уран зохёолшодой холбооной бүридэлдэ эгээл түрүүлэн Цыренжаб Сампилов, Филипп Балдаев, Мария Шестакова, Евгения Окладникова, Александр Окладников болон бусад нүхэд ороһон юм. Москва хотодо үнгэрһэн 1940, 1959 онуудай Декадануудта манай уран зураашад ехэ эдэбхитэй хабаадалсаһан байдаг. Буряадай уран зохёолшод үе сагтайгаа зэргэ алхалан, 1960-дахи онууд руу дүтэлжэ ябахадаа, уран бүтээлнүүд соогоо оршон үеын байдал харуулха тээшээ алхасаяа шэглүүлнэ.
Буряадай Уран зураашад түрүүшынгээ ехэ хуралые гүлмэрхэн хаһадаа бэшэ, 38 жэлнүүдэй туршада яһала боргожоод байхадаа эмхидхэн үнгэргөө. Хуралай хүдэлмэридэ Москва, Хабаровск, Яхадай ниислэл хотонуудһаа айлшад, намай хороонуудай, Буряадай АССР-эй Соёлой яаманай түлөөлгэшэд хабаадалсаа. Хуралай гурим мэдээжэ – үнгэрһэн саг хугасаагай тоосоон, саашадаа шиидхэхэ асуудалнууд харагдажа, зүбшэн хэлсэлгэ үргэнөөр үнгэрөө. Энэ асуудалаар Холбооной түрүүлэгшэ Г. Павлов элидхэл хэһэн байна. Партиин Буряадай Обкомой, Дээдын Зүблэлэй Президиумэй болон Засаг Газарай зүгһөө амаршалгын элидхэл партиин Обкомой секретарь А. А. Бадиев хээ. Энээн дотор партиин XXIV съездын баталһан арадай ажахые саашадань хүгжөөлгын 9-дэхи Табан жэлэй шиидхэбэринүүдые дүүргэлтэ тээшэ ухаан бодолоо, бэлиг шадабарияа шэглүүлхэ уряа табигдаһан байгаа. Тиихэдээ Д. Д. Дугаров, П. С. Намсараев, Г. Г. Васильев, А. П. Хомяков, Г. Е. Павлов, А. И. Тимин, М. Е. Шестакова, А. А. Окладников, Е. И. Неволина, А. Н. Сахаровская, П. С. Намсараев, Г. Н. Москалев, тэрэ үедэ үшөө залуу байһан Г. Васильев, Ю. Чирков, С. Ринчинов, Г. Купцов, Э. Цыденов, В. Грищенко гэгшэдэй ажал хүдэлмэриие үндэрөөр сэгнэһэн байна.
