Тус зүблөөндэ 90 хабаадагшад шиидхэхы дуутай оролсоһон байна. Тэдээнһээ гадна намай, зүблэлэй, үйлэдбэришэдэй эмхи зургаануудай, Улаан Армиин Буряадай дэбисхэр дээрэхи хэлтэсүүдэй түлөөлэгшэд уряалаар орожо хабаадалсаа.
Зүблөөнэй зүбшэхэ зүйлдэ оруулагдаһан асуудалнууд:
1. Буряад-Монголой Республикын соёлой болон үндэһэтэнэй байгуулга
2. Буряадай Һуралсалай хорооной элидхэл
3. Буряадай соёлой байгуулгын зэмсэг – монгол бэшэг
4. Монгол хэлэ янзалалгаар асуудалнууд
5. Буряад-Монгол үндэһэн һургуули, тэрэнэй зорилгонууд
6. Буряад-Монгол һургуулида түрэлхи хэлэнэй үүргэ ба удха шанар
7. Үндэһэн уран һайханай байгуулгын асуудалнууд ба тэдэнэй хүгжэлтэ
8. Буряадай дунда мэргэжэлэй багшанарай һургуулиин болон Агын, Хориин
долоон жэлэй һургуулинуудай элидхэлнүүд
М. Н. Ербанов энэ зүблөөн дээрэ БМАССР-эй соёлой болон үндэһэтэнэй байгуулга тухай элидхэл хээ.
– Монголой Арадай Республикатай харилсаа холбоогоо үргэдхэхэ,
– арадай дунда үзэг бэшэггүй байдалые усадхан, үндэһэн мэргэжэлтэдые бэлдэхэ, дээдэ һургуулинуудые, мэргэжэлээ дээшэлүүлхэ һуралсалай гуламтануудые хүгжөөн олошоруулха,
– хэблэлэй хэрэг байгуулан хүгжөөхэ,
– захиргаануудай бүридэлдэ үндэһэтэнэй хабаадалгые шэнээр хаража үзэхэ,
– ламанартай болон бөөнэртэй тэмсэл үргэдхэхэ
гэһэн шиидхэбэринүүд зүблөөнэй тогтоол болон баталагдаа.
Энээн тухай Буряад-Монголой үнэндэ 1926 оной юһэн һарын 21-нэй дугаарта уншажа болохо.
