100 жэл ехэ юм гү, бага гү, юушье хада мүнөө үедэ ажаһуужа байһан хүнүүдэй ухаанда тэрэ хүн үлэһэн, олонхимнай тэрэниие таниха байһан, хараашьегүй хүнүүдэй сэдьхэлдэ сэсэг тариһан хүгжэм дуунуудынь байнал даа…
Бау Базарович – СССР-эй арадай артист, Ленинэй, Арадуудай Хани барисаанай, «Хүндэлэлэй тэмдэг», Эсэгэ ороноо хамгаалгын дайнай хоёрдохи шатын орденуудаар шагнагдаһан, РСФСР-эй М. Глинкын нэрэмжэтэ Гүрэнэй, Буряадай АССР-эй Гүрэнэй шагналнуудта хүртэһэн, Социалис Ажалай Герой байгаа.
Хүгжэмэй олон шэглэлнүүдтэ дүйтэй байһан – оперын, хатарай (балеэдэй), ораторинууд, кантатанууд, хүгжэмэй томо шуулгануудай гүйсэдхэхэ ехэ бага зохёолнууд, найрал дуунууд, дуунууд, хүгжэмэй зэмсэгүүд дээрэ наадаха хүгжэм гээд лэ тооложол һуухаар, маанарай ганса тоолохоёо зүрхэ алдажа байхада, тэрэ хүнэй эдэ бүгэдые зохёожо гараһаниинь гайхалтай.
1936 ондо Бау Ямпилов Дээдэ-Үдын урлалай техникум дүүргэнэ, хожомынь Свердловск хотын хүгжэм дуунай дээдэ һургуулида профессор М. П. Фроловай дуу зохёолгын ангида һуража гараһан юм.
Залуу хүгжэм зохёогшо Москвада Буряад-Монголой урлалай 1940 оной декадада «Буряад-Монгол орон» гэһэн сюитээрээ СССР-эй Гүрэнэй шуулгын гүйсэдхэлгөөр хабаадана. Тиихэдэ тэрэнэй П. Берлинскийтэй суг бэшэһэн «Баяр» гэһэн хүгжэмтэ драма тэрэл декадын үедэ табигдаа.
Хэжэнгын дайдаар бага наһаяа үнгэргэһэн Бау Базаровичай хүгжэм дуунай эди шэдидэ оролгондо буряад арадай дуунууд ехэ нүлөө үзүүлһэн гэдэг. Тэрэнэй эхэ орондоо хизааргүй ехээр дуратайень зохёолнууд соонь анхаржа боломоор. Түүхын олон жэлнүүд соо хуушарха хубирха гэжэ мэдээгүй «Арюун гоохон Ангар дүүхэй», буряад арадай хүгжэмэй зэмсэгүүдэй гүйсэдхэхэ хүгжэм, дуунууд тэрэнэй гуурһан дороһоо олоор гараһан. Жэшээнь, «Талын дуран», «Аяншын дуун», «Хада уулаар», «Тосхоной саана», «Басаганай дуун», «Сэсэгтэ дайда», «Шэнхинүүр нарһад», Оперын болон Буряад драмын театрнуудта олон тоото тоглолтонуудынь Бау Ямпиловай хүгжэмөөр шэмэглэгдэһэн байдаг.
Бай Ямпилов Буряадай Хүгжэм зохёогшодой Холбооной түрүүлэгшын, РСФСР-эй Хүгжэм зохёогшодой Холбооной секретариин тушаалнуудта зэргэ хүдэлжэ байһан юм. Буряад-Монголой АССР-эй Верховно Соведэй депутат ябаа.
