Эрдэмтэн Ш. Б. Чимитдоржиев Ц. Дамдинжаповай ажабайдал, ажал ябуулга тухай дэлгэрэнгы бэшэһэн байна, тэрэ хүдэлмэрииень хэрэглэн, энэ мэдээсэл таанарайнгаа анхаралда суглуулба гээшэб.
Ц. Ж. Дамдинжапов Хэжэнгын аймагай Хара-Шугы тосхондо 1911 оной намар, сентябриин 14-дэ түрэһэн юм. Дамдинжаб эсэгэнь (нютагтаа Занхар гэжэ нэрэтэй байгаа) 1920-дохи онуудаар хушуунай хубисхалай хорооной түрүүлэгшын тушаалтай ажаллажа байһан юм, удаань хушуунай гүйсэдхэхы хороондо харюусалгата тушаал эзэлжэ байгаа.
Цырендоржо 1928 ондо түмэр замай Хёлго буудалай тосхондо долоон жэлэй һургуули дүүргэжэ гараад, эндэһээл тэрэнэй ажалай баян намтар эхилнэ. Тосхоной хамжаанда түрүүлэгшээр, уншалгын гэрые даагшаар хүдэлнэ, тиихэдээ нютагтаа тэрэ үеын оршон байдалаар ойлгууламжын хүдэлмэри эдэбхитэйгээр ябуулна. Республикын һониндо тэрэнэй бэшэһэн мэдээсэлнүүд толилогдожо захална, ехэнхидээ «Бурят-Монголой комсомолец» һониндо бэшэдэг болоо. Тиигэжэ энэл һониндоо ажалда абтажа, энэ һонинойнгоо зууршалгаар комвузда һурахаар ороно. Комвуз дүүргэһэн Ц. Дамдинжапов ПВЗ-гэй комсомолой эмхиин хоёрдохи секретарь боложо эльгээгдэнэ, удаань комсомолой Улаан-Үдын хотын хороондо, «Бурят-Монголой үнэн» һониной таһагые даагшаар хүдэлнэ.
Тэрэ үедөө уран зохёолдо һэдэбтэй байһанаа мэдүүлжэ, түрүүшээр богонихон үгүүлэлнүүдһээ захалаад, бэшэжэ эхилээ, гэбэшье ажалдаа заб тухагүй ушарһаа энэ талань хохидонги байһан гэдэг. Эсэгэ ороноо хамгаалгын Агууехэ дайнай жэлнүүдтэ Монгол орондо гүрэнэй аюулгүйн байдал сахиха үүргэтэй тусхай командировкада байгаа. Энээн тухайнь, гансал үндэр тушаал эзэлжэ байһан юм гэхэһээ бэшэ, юуншье мэдээжэ болоогүй байдаг. Энэ ажалайнгаа дүнгөөр Ц. Дамдинжапов Монголой «Алтан гадаһан» орденоор шагнагдаһан юм. Монголһоо бусажа ерээд нэгэ үе партиин Бурят-Монголой обкомдо ажаллаа, тэндэһээнь «Буряат-Монголой үнэн» һониндо харюусалгата редактораар эльгээгдэһэн байна. Заб багатайшье һаа, бэшэлгын талаар тон эдэбхитэй хүдэлжэ захална. Очеркнууд, хадхуур үгүүлэлнүүд, үгүүлэлнүүд бии боложо эхилнэ.
ВКП(б)-гэй ЦК-гай дээдэ һургуулида һуража гараад, «Правда» һониной сурбалжалагшаар, Буряадай Соёлой сайдаар ажаллаа, Буряадай телевидени болон радиогой хороондо, Буряадай номой хэблэлдэ хүдэлөө. Буряадай АССР-эй Гүрэнэй нюусануудые хамгаалгын хүтэлбэридэ даргаар ажаллаа, Буряадай Уран зохёолшодой Холбооной секретарь байгаа, Бурят-Монголой АССР-эй Верховно Соведэй депутадаар һунгагдаһан юм.
Ц. Ж. Дамдинжаповай гуурһан дороһоо туужанууд мүндэлджэ захална. Хэдэн номуудыень нэрлэхэдэ: «Ажал тухай үгэ» (1954), «Ажал гээшэ жаргал» (1958), «Алтан бэhэлиг» (1960), «Сэхэ руунь хөөрэлдэе» (1961), «Хара сагаан хоёр» (1962), «Амисхаал» (1963), «Сахилгаан хүлэгүүд» (1967), «Бадма Бата хоёр» (1971), «Дүүгэй ами наhан» (1975), «Нүхэд тухай дурдалга» (1977). Ажал хэжэ хүдэржэн ургаһан, ажал гээшые үндэрөөр сэгнэдэг тэрэнэй зохёолнууд соо гол түлэб ажалай тала, тэндэ хүдэлдэг хүнүүдэй дүрэ харуулагдадаг байгаа. Залхуу, хойрог ябадалтан арад түмэн соо ушардаг, ажалай һаалта тэдэ зоноор шанга тэмсэл ябуулха, эндэ уран зохёолшын, сурбалжалагшын үүргэ дээгүүр байха ёһотой гэжэ тоолодог, өөрөө энэ тэмсэлдэ гуурһаяа барижа хам оролсоһон хүн бэлэй.
Цырендоржо Жанабадараевич уран зохёолшодойнгоо дунда ехэ хүндэтэй хүн байһан, бусад хүнүүдтэ хандаса һайтай, хүнүүдтэ ойлгуулжа, һайнаар хөөрэлдэжэ шадаха, бэрхэ эмхидхэлшэ, нимгэн сэдьхэлтэй хүн байгаа гэдэг.