Энэ жэлэй ехэ наадан Улаан-Үдэ хотын эхин һуури табигдаһан үеһөө хойшо үнгэрһэн 350 жэлэй ойн баярта зорюулагдаһан байгаа.
Буряад театрай уран һайханай хүтэлбэрилэгшэ Эржена Жамбаловагай ээлжээтэ наадаяа эмхидхэжэ байха үедөө мэдүүлһээр, театр нааданай ээлжээтэ табсан дээрэ гарахадаа, тэрээнээ театрай хүгжэлтын ямар нэгэн талануулые тобойлгон шэнжэлхэ асуудалнуудта зорюулдаг гээшэ. Тиигэжэ 3-дахи наадандаа эгээ энэ үедөө үндэһэн театрнуудай хүгжэлтын шэглэлнүүд ямар гээшэб гэжэ шэнжэлэн хараха зорилго табигдаһан юм байгаа. Оросой Холбооной дэбисхэр дээрэ ажалаа ябуулжа байдаг үндэһэн театрнуудта юун дуталданаб, тэдэ театрнууд ямар арга боломжонуудтайб гэжэ мэдээжэ, гэбэшье энэ асуудалнуудые шиидхэлгэдэ үшөөл «зүб талаһаань» хандажа үзэгдөөгүй байһаар гэжэ мэдүүлээ бэлэй.
Ехэ наадан табан үдэрэй туршада үнгэржэ, юһэн һарын 16-да дүнгүүд элирбэ. Эдэ үдэрнүүдтэ Буряад театрай, Ород театрай, «Үльгэр» театрай тайзанууд дээрэ табигдаһан зүжэгүүдые манай театрһаа гадна Оросой Холбооной, мүн дүтын хари ороной өөрсэ маягтай үндэһэн зургаан театрнууд мүрысөөнэй гуримаар хабаадажа гараа гэбэл: «Читиген», Топановай нэрэмжэтэ Хакасс театрнууд, «R.A.A.A.M» гэһэн Эстон театр, Монголой Нацагдоржын нэрэмжэтэ театр, Мажит Гафуриин нэрэмжэтэ Башкир театр, Дотор Монголой Ордос хотоһоо монгол зүжэгшэдэй «Одон» нэгэдэл.
Нааданай дүнгөөр шагнал хайранууд яажа хүртэбэ гэбэл:
Уласхоорондын «Алтан сэргэ» наадайнай «Зүжэгшэдэй эб нэгэ эрхим наадан» гэһэн тусхай шан Башкириин Гүрэнэй М. Гафуриин нэрэмжэтэ академическэ драмын театрта;
«XXI зуунай Ромео» гэһэн тусхай шан Монголой Д. Нацагдоржын нэрэмжэтэ эрдмийн драмын театрай зүжэгшэн Б. Шинбаярта;
«Оршон үеын үндэһэн зохёолдо хандалга болон театрай шэнэ хэлэ бэдэрэлгэ» гэһэн тусхай шан Башкириин Гүрэнэй М. Гафуриин нэрэмжэтэ академическэ драмын театрта;
«Ромео Джульетта хоёр» гэһэн зүжэгтэ уран зураашын эрхим хүдэлмэриин түлөө шан Г. Скоморохов А. Шенталинская хоёрто;
«Ромео Джульетта хоёр» гэһэн зүжэгые хүгжэмөөр эрхимээр шэмэглэһэнэй түлөө шан Чинбатын Батмөнхдэ;
«Хоёрдохи ээлжээнэй эрхим эхэнэр дүрэ» гэһэн шан «Ромео Джульетта хоёр» гэһэн зүжэг соо Үрлэг эхын дүрэ харуулһан Жамсранжавын Оюундарьда;
«Хоёрдохи ээлжээнэй эрхим эрэ дүрэ» гэһэн шан «Ромео Джульетта хоёр» гэһэн зүжэг соо Меркуцио боложо наадаһан Эрдэнэ-Туяагийн Тодгэрэлдэ;
«Эрхим эхэнэр дүрэ» гэһэн шан «Ромео Джульетта хоёр» гэһэн зүжэг соо Джульеттын дүрэ харуулһан Ольга Ранжиловада;
«Эрхим эрэ дүрэ» гэһэн шан П. Ойунскийн «Хиирэһэн Муклай» гэжэ зүжэгтэ Хиирэһэн Муклайе наадаһан Алексей Сагатаевта;
«Найруулагшын эрхим хүдэлмэри» гэһэн шан тэрэл «Хиирэһэн Муклай» гэжэ зүжэг табиһан Сергей Потаповта;
«Эрхим зүжэг» гэһэн шан Хоца Намсараевай нэрэмжэтэ Буряад театрай табиһан «Ромео Джульетта хоёр» гэһэн зүжэгтэ.
Нааданай түгэсхэлэй үдэр мүн лэ һонирхолтой байгаа.
Юуб гэхэдэ 12:00 сагта Буряад театрай тайзан дээрэ Ж-Б. Мольерэй «Сганарель или мнимый рогоносец» (Сганарель гэхэ гү, али худалаар эбэр зүүгшэ) гэһэн Г. Торстянецкийн богонихон болзор соо түлэблэн табиһан энеэдэнэй зүжэг харалган үнгэрөө.
Тон тиимэ зүжэг харалган 15:00 сагта энэл театрай тайзан дээрэ үнгэрһэн байна. Энэ удаа Дмитрий Егоровой табиһан Д. Приваловай «Прекрасное далёко» («Гоо һайхан алас») гэһэн зүжэг байгаа.
Эдэ бүгэдые Москваһаа ерэһэн театр шэнжэлэгэшэ Анна Банасюкевич ударидаһан байна. Эндэ табигдаһан зүжэгүүдэй хуби заяан байн, театрай саашанхи ажабайдалда шиидхэгдэдэг юм.
