Тиигэжэ энэ жэлэй арбан һарын эхеэр ээлжээтэ ойгоо угтажа байһан Дарима Линховоиной бүхы наһан үргэлжэ зэдэлһэн хүгжэм доро үнгэрхэ заяатай байгаа юм байна. Энэ наһандаа горитойхон туйлалтануудые дабажа гараһан Дарима Лхасарановна мүнөө энэ үедөө Буряад оронойнгоо нюур боложо тодоронхой, нэрэ һүлдыень дэлхэй дээгүүр үргэжэ, бишыхан арадаа олоной дунда түлөөлжэ ябана.
Тоглолтонуудые найруулагша, багша, пианино дээрэ хүгжэм тоглогшо, урлалай ехэ бүлгэмэй хүтэлбэрилэгшэ, энэ бүлгэмэй хүгжэлтын шэглэл тодорхойлдог, агууехэ түрэлхидэйнгөө үргэжэ ябаһан хүндэтэйшье, хүндэшье хэрэг үргэлжэлүүлжэ байха буянтай дэлхэйдэ мэдээжэ хүн гээшэ бшуу даа. Оросой Холбооной арадай артист, Буряад Уласай Гүрэнэй шагналтан, Буряадаймнай эгээл ехэ театр болохо Дуури бүжэгэй театрай гол хүгжэмшэн Дарима Линховоин театрайнгаа зүжэгшэдые (хүгжэм гүйсэдхэгшэд болон дуушадые) олон тоото ойро, холын ехэшье, багашье харалга мүрысөөнүүдтэ бэлдэжэ, тэдээнээ дахуулжа, абажа ябажа, амжалтын үндэрөөр дамжаһаар бусажа ерэдэг гээшэнь заншал болошонхой. Хүгжэм гээшые шагнажа һуухада гоёл даа, энээнһээ үшөө хэншье арсаагүй бэлэй. Харин тэрэ хүгжэмэйнь эхин дээрэ, һорилго бэлэдхэлэй айхабтар ехэ хүдэлмэри хэжэ мэргэжээд, тон лэ наадаха ёһоорнь наадаха гээшэ хүндэхэн ажал гээ һаа хүн ойлгохо ёһотой.
Дарима үшөө бага наһанһаа гэрһээ холо хүгжэмэй тусхай һургуулида һуража үндыгөө – Ленинградай хүгжэм дуунай дээдэ һургуулиин дэргэдэхи тусхай хүгжэмэй һургуули гэжэ байгаа, тэндэ һуража энэ хүгжэмэй эди шэдиие шудалһан юм. Байн, 1975 ондо суута түрэлхидэйнгөө дүүргэжэ гараһан тэрэл, Ленинградай хүгжэм дуунай дээдэ һургуулиие дүүргэжэ гараһан байгаа. Олоной дурлагша түб хотодо үлэхэ аргын байгаашье һаа, наашаа, Буряад ороноо бусажа, эндэхи оперынгоо театрта ажалда ороно. Театрай гол дуушадай бүлэгтэ хүгжэмшэн боложо, тэдэнь (тэрэ тоодо өөрөө Һасаран Лодонович, СССР-эй арадай дуушан) тэрэнэй гар дороһоо тоглолтынгоо зам эхилдэг болоо. Залуухан хүгжэмшэн театрта ерэжэ, Л. Линховоин, К. Базарсадаев, Д. Дашиев, С. Раднаев, В. Буруев гэһэн элитэ дуушадтай ажаллахадаа, өөрөө тэдээнһээнь ажалай айхабтар ехэ дүршэл абаһан, энэнь тэрэнэй хожомой ехэ амжалтын эхин болоо гээшэл даа.
Дарима Линховоинай театрта орожо ажаллажа эхилһээр үнишье болоогүй байхада залуухан Галина Шойдагбаева, Ольга Аюрова гэгшэд бии болоно, саашадаа эсэшэ сусашагүй ажалайнь дүн боложо тодорһон мэдээжэ дуушаднай гэмээр: Вячеслав Бальжинимаев, Валентина Цыдыпова, Елена Шараева, Татьяна Шойдагбаева, Дамба Занданов, Владимир Албатаев, Шагдар Зондуев, Ганбат, Оксана Хингеева, Билигма Ринчинова, Намхайн Мөнхзул, Ольга Жигмитова, Монголой бэлигтэн Чимэдын Энхтайван.
Үнишье болоогүй, Дарима Линховоинай һургажа гаргаһан Арюунбаатарын Ганбаатарай туйлаһан ехэ амжалта манай Дарима Лхасарановнагай дэлхэйдэ ахагүй бэлигые гэршэлбэ бэлэй.
Наһанайнгаа олон дабаануудай ээлжээтэ нэгэн дээрэнь гараад байхадаа, үнгэрһэн жэлнүүдээ дурсан, хэһэн, туйлаһаараа омогорхожо, аба эжыдээ, арад зондоо, аза заяаһан алтан дэлхэйдээ баяртай, жаргалтай ябыт даа гэжэл юрөөгөөд, энэм бултанай зүгһөө байха бэзэ гэжэ найдаял даа.
