Соёлой үдэрнүүдэй эхин дээрэ омогорхомоор болоһон ушар гэхэдэ, манай түлөөлэгшэдэй Подольскдо бодхогдоһон сэрэгэй алдар солын Дурасхаалта газарта хүрэжэ, Эсэгэ ороноо хамгаалгын Агууехэ дайнай эхин дээрэ Москва хотые хамгаалжа унаһан баатар сэрэгшэдэй хүүрнүүд дээрэ гүрлөө табилгын ёһолол болоо. Буряад Уласай Соёлой сайд Тимур Цыбиков, Улаан-Үдын мэр А. Голков гэгшэд түлөөлгые толгойлһон байха юм. Дайнай жэлнүүдтэ гансал Улаан-Үдэ хотын 30 гаран мянган хүбүүд Улаан Армида абтажа, эсэгэ ороноо хамгаалгада амии бэеэ гамнангүй хабаадаһан, тэдэнэй 18 000 гараниинь бусажа ерээгүй, дайнай газар дээгүүр үлэһэн байна гэжэ манай түлөөлгэ мэдүүлээ.
Тиихэдэ 1941 оной октябриин 25-да Москва тээшэ тэгүүлһэн фашистнуудые зогсоожо, гэдэргэнь сохижо эхилһэн түүхэтэ үйлэ хэрэгтэ нютагаймнай хүбүүд хабаадалсаха үйлэтэй байгаа гээшэ.
Дайшалхы габьяагай түлөө энэ дивизинь хоёр дахин Улаан тугаар, тиихэдэ Улаан тугай болон Суворовай орденуудаар щагнагдаһан юм. 13 Советскэ Союзай герой гэһэн үндэр нэрэ зэргэдэ хүртэгшэд, сэрэгшын эгээ үндэр шагнал болохо Алдар солын гурбан шатын орденуудай кавалер, тиихэдэ хэдэн мянгаад сэрэгшэд дайшалхы орден медальнуудта хүртэһэн юм гэжэ түүхэ гэршэлдэг.
Улаан-Үдын соёлой үдэрнүүд ноябриин 1-һээ 15 болотор үргэлжэлхэ. Ниислэл хотын 10 ехэ талмайнууд дээрэ Буряадаймнай соёл, урлалай мэдээжэ бэлигтэн тоглолтонуудаа дэлгэхэ гээд хүлеэгдэнэ.
Полная версия: https://www.baikal-daily.ru/news/19/221264/
