Сурбалжалагшадтай болоһон энэ уулзалгада Москвагай Засаг Газарай үндэһэтэнэй асуудалнуудай, яһатан хоорондын харилсаануудай болон аяншалгын албанай толгойлогшо Виталий Сучков, Буряад Уласай Соёлой сайд Тимур Цыбиков, Улаан-Үдын толгойлогшо Голков, ТАСС-ай түлөөлэгшэ Ирина Александрова, Оросой Холбооной болон Буряадай олондо мэдээсэл тараадаг хэрэгсэлнүүдэй түлөөлэгшэд хабаадабад.
Буряадай соёлой болон урлалай эгээл эрхим туйлалтанууд Москва, Санкт-Петербург хотонуудай урлал дэлгэдэг талмайнууд дээрэ харуулагдаха гэжэ Соёлой сайд Тимур Цыбиков мэдүүлбэ. Тиихэдээ «Эдэ бүгэдэ манай соёл, урлалай эмхи зургаануудай Москва, Санкт-Петербург хотонуудай гол эмхи зургаануудтай нягта холбоотой байһан ушарһаа. Ниислэл хотонуудай арад зон манай уласай эрхим туйлалтануудые хараха байһан ушарта айхабтар ехэ баяртай байнабди» – гэжэ хэлээ.
Тимур Цыбиков сурбалжалагшадай асуудалнуудта харюу болгон «Арбан нэгэн һарын нэгэндэ 800 гаран хүүгэд Буряадай циркын тоглолто түлөөһэгүй хараха. Энэнь Москвагай Ехэ циркын дүхэригтэ болохо юм. Иимэ шиидхэбэри Москвагай Засаг Газартай манай баталһан хамтын шиидхэбэриин үндэһэн дээрэ үнгэрхэ. Намарайнгаа амаралтын үдэрнүүдтэ Москвагай хүүгэд манай циркын, манай «Үльгэр» гэжэ хүүхэлдэйн театрай тоглолтонуудые ябажа хараха аргатай» – гэжэ нэмэжэ хэлэбэ.
Улаан-Үдэ хотынгоо 350 жэлэй ойн баярые гансашье гэртээ үнгэргэжэ найрлаха бэшэ, холын түб хотонууд руу гаража ошохо гээшэ дэмбэрэлтэй һайхан гэһэн сэгнэлтэ үгтэбэ.
Өөрынгөө ээлжээндэ Виталий Сучков манай зоримгой алхамые гайхажа байһанаа мэдүүлээд, ерэхэ 2017 оной долоон һарада Москвагай соёл, урлалшад харюугай ябадал хэжэ, Улаан-Үдэ айлшалжа ошохо байхабди гэжэ мэдүүлбэ.
Уулзалгын үедэ Улаан-Үдэ хотын ажахы болон аялал эрхилэлгын талаар арга боломжонууд, үндэһэн нааданууд тухай Москвагайхидай һонирхол тушаа хоёр таладаа ашатай хөөрэлдөөнүүд болоо.
