Мариинскэ театрай тоглолтын танхим соо оперын бүлэгэй Гала-концерт, тиихэдэ Александриинскэ театр соо бүжэгэй үдэшэ зарлагдаһан ёһоороо үнгэрөө.
– Энэ хадаа гансашье Улаан-Үдын түүхэтэ үйлэ бэшэ, мүн манайшье хотын үйлэ гээшэ бэзэ – гэжэ эндэхи дуу хүгжэмэй дээдэ һургуулиин профессор Тамара Новиченко хэлэбэ. Энэ хүн мэдээжэ дуушад Галина Шойдагбаевагай, Анна Нетребкын, Вероника Джиоевагай болон бусад олоной багша юм. Тэрэнэй 70 шабинар дэлхэй дүүрэн таража гаранхай дуулажа байдаг, тэдэнэй 51-ниинь уласхоорондын мүрысөөнүүдтэ илагшад, эдээнтэйшье зэргэсүүлэн харахада Буряадаймнай дууриин урлал, дуушад үндэр сэгнэлтэдэ хүртэнэл гээшэ ха юм даа.
– Танай театрые би ехэ сэгнэдэгби. Хоолойнуудай гоё тэндэл юмэл даа! Би энэ тоглолтодо ерэжэ, яажа дуулаха ёһотой юм гэжэ шагнагты гэжэ өөрынгөө оюутадтэ хэлээб. Би бүхы дэлхэй дээгүүр дуулаха арга шадабарида һургажа ябадагби, иигэжэ дуулаха нэгэшье хүн дайралдаагүйл даа. Галя гэжэ тусагаар хүн. Тэрэнэй мүрысөөндэ хабаадхада, Ирина Архипова миил хайлажа байгаа һэн, – гэжэ мэдээжэ багша тоглолтын урда дурсан хөөрэбэ.
Зүблэлтэ Буряадай намай болон Засаг зургаануудай хүтэлбэрилэгшэдэй нэгэн байһан Лидия Чимитовна Нимаева Галина Шойдагбаевагай Миланда һуралсал гаража ерэхэдэ, Уласхоорондын мүрысөөндэ илалта туйлахадань «Улаан-Үдэ хотомнай Милан-Үдэ гээдшье нэрлүүлжэ байхадаа хамаагүй болоол даа» – гэжэ хэлээ бэлэй. Мүнөө манай зүжэгшэд эдэ үгэнүүдэй дэмы хэлэгдээгүй ушарые баталба гээшэ. Танхим дүүрэн харагшад, эндэ гансашье тиишээ түбхинэһэн нютагайхид бэшэ, мүн Буряадай дуушадай хоолой шагнахаяа зорюута ерэгшэд олон байгаа.
– Юун гэһэн гоё, ямар ехэ жаргал гээшэб, – гэжэ харагшадай нэгэнэй шэбэнэн дуугархань дуулдана…
Мариинскэ театрай хүгжэмэй шуулгын наадан манай дуушадай хоолойе үшөөшье үргэжэ, дуушадаймнай хоолой бүришье һаа гоёор гарадаг болоод байгаа.
Манай театрай энэ тайзан дээрэ тоглолтоёо дэлгэһэн сагһаа хойшо 20 гаран, 30 шахуу жэлнүүд үнгэршөө. Манай дуушадай урлал анхан байгуудагдаһан үеһөөнь хойшо энэ хототой тон нягта холбоотой байһан юм. Буряадай дууриин абарга Һасаран Линховоин, Буряадаймнай алтан жасада ороһон Ким Базарсадаев, Клим Миткинов, Леонард Шоболов, Ольга Аюрова, Елена Шараева, Виктория Базаров, тээ хожомынь Галина Шойдагбаева гэгшэд энэл хотодо, һуража гараһан, С. М. Кировэй нэрэмжэтэ театр соо тэдэнэй хоолойн һайхан шэнгэһэншье байхадаа болохо.
Энэ удаа манай театрай дууриин бүлэг Дарима Линховоинай ударидалга доро хори гаран хүгжэмтэ зохёолнуудые тайзан дээрэ гаргаба. «Игорь тайжа», «Елбэрын хатан», «Кармен», «Шэдитэ жэмбүүр» гэһэн дууринуудһаа ааринуудые дуулаа. Хүгжэм дуунда дуратайшуулда ёһотойл бэлэг боложо Чайковскийн, Глинкын, Римский-Корсаковай, Мусоргскын, Леонкаваллын, Д. Вердиин, Пуччиниин, Моцартын, Масканьин, Россиниин, Понкъеллиин шэдитэ хүгжэм зэдэлээ.
Тоглолтын һүүлдэ Анатолий Андреевэй мэдээжэ «Тоонто нютаг» гэжэ дуун нэрьем альга ташалгаар угтагдаа.
Мүн тиимэл халуун альга ташалган доро Александриинскэ театрта бүжэгэй үдэшэ үнгэрһэн байна.
