Эндэ Буряад Уласай Соёлой сайд Тимур Цыбиков хабаадажа, үгэ хэлээ.
– Долоон жэлэй туршада ехэл шударгы хүдэлжэ, мэдээсэлнүүдээрээ андалдажа байдаг гээшэбди. Манай нииислэл хотын үдэрнүүд Москва, Ленинград хотонуудай эгээл эрхим талмайнууд дээрэ үнгэржэ байна гэжэ ехэ баяртайбди. Энэ үзэсхэлэндэ орожо хараһан хүнүүд манай хотын түүхэтэй дүтэ танилсажа гараха байха гэжэ баяртайгаар найданабди, – гэжэ сайд хэлэбэ.
Нээрээшье гайхамшагта үзэсхэлэн эндэ дэлгэгдэбэ гэжэ хэлэхэ хэрэгтэй. Хайшан гэжэ оройдоол гурбан зуугаад жэлнүүдэй туршада мондогор модоор баригдаһан үбэлжөөнүүдһээ мүнөө үеын хото бодхоогдоод байнаб гэжэ хөөрэһэн энэ үзэсхэлэн удха түгэлдэр.
Тиихэдэ урда үдэрынь, долооной үдэр, Оросой Үндэһэн номой санда «Буряадай шэнэ номууд» гэһэн үзэсхэлэн дэлгэгдээ бэлэй.
Энэ үзэсхэлэнгэй баяр баясхалангай оршондо нээлгэн дээрэ Буряад Уласай Соёлой сайд Тимур Цыбиков, орлогшо сайд Николай Емонаков, Буряадай Үндэһэн номой сангай захирал Людмила Гармаева, эндэхи номой сангай хүтэлбэри болон ажаллагшад хабаадаба.
2014, 2015 онуудай туршада «Буряадай соёл», «Буряад Уласта буряад хэлэ сахин хүгжөөхэ» гэһэн, тиихэдэ Оросой «Оросой яһатануудай нэгэдэл бэхижүүлгэ ба Оросой арадуудай үндэһэн соёл хүгжөөлгэ» гэһэн түсэлөөр Буряад Уласай Соёлой яаман болон Буряад Уласай Үндэһэн номой сан 51 ном хэблэжэ гаргаа.
Буряад ороной хэблэл тухай хэлэхэдэ гайхалтай бэлэй даа. Энэмнай улас түрэеэ Оросой Холбоондо түлөөлдэг юм. Жэшээнь «Буряадай уран зохёолшод 1941-1945 онуудай Эсэгэ ороноо хамгаалгын Агууехэ дайн тухай» гэһэн хэблэл Бүхэоросой XI мүрысөөндэ илагша боложо тодороо һэн. «Оросой эрхим ном» гэһэн харалганда Я. Ивахиновагай «Буряад түрын ёһо гуримууд» гэһэн ном илажа гараа бэлэй. Эдэ болон бусад номууд Оросой Үндэһэн номой санда бэлэг болгогдон дамжуулагдаха.
Иимэ арга нүхэсэл олгоһон Оросой Үндэһэн номой санда манай сайд баяр хүргэбэ. Үзэсхэлэн арбан нэгэн һарын 18 болотор үргэлжэлхэ.
