Хоёр хотонуудай хоорондо соёлой харилсаануудые бэхижүүлхэ хэрэгтэ түрүүшын алхам хэгдэбэ гээшэ.
Хани халуун харилсаанай, бэе бэеэ ойлголсолгын оршондо үнгэрһэн энэ уулзалга дээрэ хэдэн асуудалнууд табигдажа, зүбшэгдөө. Манай сайд энэ үедөө тогтоод байһан соёлой талаар хоёр хотонууд хоорондын харилсаанууд дээрэ тодорхой тогтожо хөөрэжэ үгэбэ, тиихэдээ эндэхи театрнуудые Улаан-Үдэдөө угтажа абахаар бэлэн байһанаа мэдүүлээ. Оросой Европын түб хотонуудаар манай соёл, урлалшад хэды шэнээн амжалтатай ябажа байна, хэды олон аша үрэтэй уулзалганууд үнгэрбэб гэжэ элидхээ. «Балтиин байшанда» үнгэрһэн Гала-концерт хотын захиргаанай соёлой хорооной хүтэлбэрилэгшэдтэ үндэрөөр сэгнэгдээ.
Энэл үдэр Буряадай дуу хатарай үндэһэн «Байгал» театр хотын харагшадтай М. Горькийн нэрэмжэтэ соёлой ордондо уулзаба. Манай ороной түрүүшын соёлой ордон 1 100 һууритай, харагшад тэрэниие дүүргэжэ суглараал гээшэ. Манай театр тэрэл үглөөгүүр Москваһаа ерэжэ бууһан байгаа.
Харагшадай зүгһөө айхабтар үндэр сэгнэлтэ үгтэбэ, ямар нэгэн эди шэдиин орондо ороод байһан мэдэрэлээрээ харагшад, һэгшэһэндээ амилжа ядан, хубаалдабад.
– Зүжэгшэд эсээ, тэрэ мүртөө тэрээнииень харагшад анхарбагүй ха юм, – гэжэ театрай уран һайханай хүтэлбэрилэгшэ Жаргал Жалсанов сурбалжалагшадта мэдүүлбэ. Эсэһэнээ мэдүүлэнгүй тоглоншьегүй яахаб даа, түрэл хотынгоо үндэр нэрые оронойнгоо түб хотонуудаар үргэжэ ябанад ха юм.
