Энээгээр арбан нэгэн һарын эхинһээ захалһан Улаан-Үдын соёлой үдэрнүүд дүүрэхэ юм. Энэ удаа Н. Бестужевай театр Улаан-Үдын харагшадта һайшаагдаһан Анна Батуринагай зохёолоор табигдаһан «Фронтовичка» гэжэ зүжэгөө Хойто ниислэл гэжэ алдаршаһан хотынхидта харуулхань гээшэ.
Энэ зүжэг соо сэрэгтэ хабаадажа, Илалтын баяртай суг нютагаа бусажа ерэһэн, дайнай газарта инаг дураяа золгоһон 24-тэй басаганай хуби заяан харуулагдана…
Энэ зүжэг Сергей Левицкий найруулан табяа, март соо Москвада «Алтан баг» гэжэ Оросой театрнуудай ехэ нааданда дурадхагдаһан байгаа. Тиихэдэ май һарада Новосибирск хотодо үнгэрһэн можо нютагууд хоорондын «Ново-Сибирский транзит» гэжэ IV мүрысөөн-харалгада дипломдо хүртэһэн зүжэг байха.
Гол дүрэ байгуулжа наадаһан зүжэгшэн Светлана Полянская «Эрхим эхэнэр хүнэй дүрэ» байгуулжа шагналда хүртөө, найруулагша мүн лэ дипломдо хүртэһэн юм.
