Энэ наадан жэл бүри намарай хаһада эмхидхэгдэжэ, Түбэй дэргэдэхи бүлгэмүүд жэл соо туйлаһан амжалтануудаа хүн зондоо харуулдаг юм. Харин зунай эхиндэ хэгдэһэн ажалай тоосоото наада дэлгэжэ, дүн согсологдодог.
Тус нааданда арадай аман зохёолой дүрбэн бүлгэмүүд: “Магтаал”, “Уряал”, “Наран Гоохон”, “Ойхон” болон Үбэр-Байгалай шэмээшэгүүдэй “Истоки”, тиихэдэ “Лотос”, “Булжамуур” гэһэн хатарай ансамбльнууд хабаадаа.
– Эдэ бүлгэмүүд манай Буряад Улас түрын арадай урлалай түбэй дэргэдэ байгуулагданхай. Энэ наадаар шэнэ хаһа эхилбэ гэжэ мэдүүлнэбди. Гаража ерэһэн хаһамнай юугээр онсоб гэхэдэ, манай хоёр бүлгэмүүд ойн баярнуудаа тэмдэглэхэ юм, – гэжэ түбэй уран һайханай таһагые хүтэлбэрилэгшэ Маргарита Чимитова мэдээсэбэ.
“Истоки” гэһэн Үбэр-Байгалай шэмээшэгүүдэй хоор 2017 ондо 50 жэлэйнгээ ойн баяр тэмдэглэхэ. 1967 ондо энэ ансамбль Зүүн-Сибириин соёлой академиин багша Николай Дорофеев Ехэ-Хунила гэһэн тосхонһоо Улаан-Үдэ руу нүүжэ ерэһэн зонһоо бүрилдүүлжэ, байгуулһан юм. Тэрэ гэһээр шэмээшэг арадай заншалта байдал, соёл, дабтагдашагүй аялга дуу үе үедөө дамжуулжа, арад зоноо баясуулжа байдаг. Мүнөө тус бүлгэмые Буряад Уласай соёлой габьяата хүдэлмэрилэгшэ, Буряад Уласай Гүрэнэй шангай лауреат Вера Долженко хүтэлбэрилнэ. “Уряал” гэһэн бүлгэм (хүтэлбэрилэгшэнь Аюша Ринчинов) ерэхэ жэлдэ 35 жэлэйнгээ ойн баяр тэмдэглэхэ юм.
Мүнөө жэл Буряад Уласай арадай урлалай түбэй зохёохы бүлгэмүүд ехэ олон хэмжээнүүдтэ хабаадаа, шэнэ проектнуудые зохёогоо, ехэ тоглолтонуудые дэлгээ.
– Манай бүлгэмүүд өөһэд хоорондоо ехэ эбтэй юм. Бэе бэеынгээ амжалтада булта баясажа, дэмжэлсэжэ байдаг. Энэ иимэ нэгэдэмэл наадаяа дэлгэхэдээ, бидэ өөдөө ургажа, зохёохы ажалаа хүгжөөжэ, шэнэ гүйсэдхэгшэдтэй, бэлигтэй хүтэлбэрилэгшэдтэй боложо байна гээшэбди гэжэ харуулнабди, – гэжэ түбэй ахамад найруулагша Ольга Вавилова мэдээсэбэ.
Зүүн, баруун буряадуудай отог угын заншалта дуу, наада харуулжа, буряад арадаймнай соёл урлаг гайхамшаг ехэ, дундаршагүй гүн баялигыень эдэ дүрбэн бүлгэмүүд харуулжа шадаа. Урдын дуунуудтай зэргээшэн, “Булжамуур”, “Лотос” бүлгэмүүдэй эдир болон томошье хатаршад гоё һайхан, “ялас” гэмэ хатараараа харагшадаа хужарлуулаа. Илангаяа “Булжамуур” бүлгэмэй жаахан хөөрхэн хатаршад бүгэдэнэй зүрхэ сэдьхэл буляагаал хаш. Хатар бүхэниинь нэгэ һонин хөөрөөн. Жэшээнь, сүлжээ холбооной дэлисэдэ тэмээнэй хажууда ногоон дэгэлтэй, улаахан пулаадтай жаахан басагахан ехэ энеэдэтэй, хүхюутэй зогсожо байһан зураг ехээр таража, олондо һайшаагдаа бэлэй. Тэрэ зураг үндэһэлэн, “Хүхюу тэмээн” гэһэн хатар зохёогдоо. Иимэ һонин хатарнуудые зохёожо, үхибүүдые дээдын соёлоор хүмүүжүүлжэ байһан хүтэлбэрилэгшэ, Буряад Уласай соёлой габьяата хүдэлмэрилэгшэ, “Душа Росии” гэһэн Ородой Холбооной шангай лауреат Людмила Овчинникова болон залуу балетмейстер Алексей Цыремпилов гэгшэд болоно.
Саг хахадай хугасаада табигдаһан наадан нюдэ сабшаха зуура түгэсэбэ. Удааруулжа байгаагүй, булта бүлгэмүүд тоб байса, нэгэ дуугаар наадаяа харуулаа. Харагшад гэнтэ түргэн дүүрэшэһэн наадые сэдьхэлээ ханан харабашье, үшөөл үргэлжэлһэй гэжэ хүсэһөөр, тарабад.
Буряад Уласай арадай урлалай түб энэ хаһада хэдэн һонин шэнэ толголтонуудаараа харагшадаа баясуулха. Бүри һаяын сагта “Истоки” гэһэн Үбэр-Байгалай шэмээшэгүүдэй хоор тоосоото наадаяа дэлгэхэ. Энэ нааданда хасаг хүбүүн шэмээшэг басага һамга болгожо абаха заншалта ёһо гуримай наадан харуулагдахаар хүлеэгдэнэ.
