– Энэ наада эмхидхэлгын ехэ хүдэлмэри Буряадаймнай эвенк яһатанай ажаһуудаг аймагууд болон бусад можо нютагуудаар үнгэржэ, эрхимүүд шэлэгдээ. Тиихэдэ Буряад оронһоо гадуур ажаһуудаг эвенк нютагуудай олонхинь энэ ехэ нааданай тоглолтодо оролсоошьегүй һаа, хаража, дүршэл халан абаха зорилготой хабаадалсаха байһанаа мэдүүлһэн байгаа – гэжэ эвенк соёлой түбые ударидагша Надежда Шеметова хэлэнэ. – Энэнь нэгэ талаараа манай хэжэ байһан хэрэг ажалые үндэрөөр сэгнэһэн хандаса гээшэ. Манда харуулха, хэлэхэ юумэ яһала биил ха юм. Тиимэһээ энэ ушарта манай харюусалга эрид дээшэлнэ – гэжэ нэмэжэ хэлэбэ.
Үнэндөө ехэ юумэ хэгдээ гэжэ харагдана. «Эвенк хүгжэмэй түүбэринүүд» хэблэгдээ. Энээн соо Оросой Холбооной дэбисхэр дээрэ ажаһуудаг бүхы эвенкнүүдэй дуу хүгжэм оруулагданхай. 2014 ондо «Зүрхэтэй ангуушан Тымауль» гэжэ зүжэг П. Чайковскийн нэрэмжэтэ дунда мэргэжэлэй урлалай һургуулиин, Буряад театрай, тиихэдэ аймагуудай түбүүдэй тайзанууд дээрэ табигдажа, ехэ дулаанаар угтагдаһан юм. 2015 ондо эвенк хэлэн дээрэ үльгэр, онтохонууд болон домогуудай ехэ наадан-мүрысөөн үнгэрөө бэлэй. Энэнь мүнөө жэл хоёрдохиёо үнгэрнэ. Гаргашын асуудалнуудые гуримшуулхын түлөө эдэ хоёр наадануудые хамтадхажа үнгэргэхэ шиидхэбэри абтаһан байгаа. Красноярскын, Хабаровскын, Үбэр-Байгалай хизаарнуудай, Эрхүү, Амар можонуудай түлөөлэгшэд хабаадана. Тиихэдээ эдэмнай холын хүдөөгэй ажаһуугшад гэжэ онсолхо шухала. Үшөө тиихэдэ Буряадаймнай аймагууд.
Энэ ехэ түлэбые эвенк үндэр наһатад дэмжээ, хубиин хэрэг эрхилэгшэ Минеев В. Б. нааданай эбээн тэдхэгшэ болоһон байна.
