Тэрэ гэһээр Буряадай харагшадай һонирхол табяагүй, сэдьхэлыень эзэлһэн зандаа. Тиимэ байнгүй яахаб теэ, домог хуушарха гэжэ байдаггүй, домог харуулһан наадан өөрөө домог боложо тодороо ха юм. Тэрэ мүртөө манай театрай нюур боложо, ябаһан лэ газартаа театрайшье, арадайшье нэрэ һүлдые үргэжэ байдаг бэлэй.
Хатарай дүрэнүүдые нарин бүтээжэ байгуулһан энэ бүжэг эды олон жэлнүүд соо анхан табигдаһан зандаа хүрэжэ ерэһэн даб дээрээ гансахан буряад зүжэг гээд тоологдодог. Бүжэгэй либреттые мэдээжэ уран зохёолшо Намжил Балдано буряад арадай урданай олон тоото домогуудай нэгэн дээрэ үндэһэлжэ бэшэһэн юм. Тэрээн соонь Байгал үбгэнэй ганса басаган Ангар дүүхэйн дура эзэлхэ һаналтай Енисей баатар, энээндэ зэргээшэжэ бии болоһон хара хүсэнүүд, Ангарын Енисей баатарта бодхуултажа ошоһон, үбгэнэй сухал – эдэ бүгэдэ урлалай аргаар, урлалай хүсөөр харуулагдаһан гэжэ хүн бүхэн мэдэнэ ха юм даа. Бау Базарович баледээ бэшэхэдээ буряад дуунуудай аялга тааруулан хэрэглэһэн гэдэг. М. Заславский хатарыень найруулан табиһан, энээндэнь буряад урлал һайн мэдэхэ И. Моисеев ехэ туһа хүргэһэн байгаа.
Тус зүжэгые айхабтар гоёор наадажа табиһан, түүхэдэ ороһон түрүүшын бүжэгшэд гэхэдэ Л. Сахьянова, П. Абашеев, Ц. Бадмаев, Ф. Иванов, Ю. Баранов, Ю. Семёнова гэгшэд байһан юм.
Түрүүшын дирижёр Буряадай АССР-эй урлалай габьяата ажал ябуулагша В. Маймескул, уран зураашадынь А. Тимин М. Шестакова хоёр байгаа, тиигэжэ уран һайханаар, ехэ гоёор шэмэглэгдэһэн балет бүтэһэн гэдэг. 1959 оной хоёрдохи Декадада Буряадай омогорхол болон табигдаһан, үндэр сэгнэлтэнүүдтэ хүртэһэн байдаг.
1972 ондо энэ зүжэгые хоёрдохиёо найруулан табихадань Л. Книппер, Б. Ямпилов, М. Заславский, А. Тимин, Л. Сахьянова, П. Абашеев гэгшэд М. Глинкын нэрэмжэтэ Гүрэнэй шагналда хүртэһэн юм.
Энэ удаа баһал һэргээлгын ехэ хүдэлмэри хэжэ Буряадаймнай Оперо болон баледэй театр «Арюун гоохон Ангар дүүхэйгээ» арад түмэндөө дурадхахань гээшэ.
