Театрай һайн дуранай бүлгэмтэй гү, али арадай театртай аймагуудай соёлой гуламтанууд энэ ехэ нааданда хабаадалсана. Энэ хадаа ехэ нааданай үргэлжэлэл гэжэ эхин дээрээ мэдүүлхэ хэрэгтэй. Һая эхилхэдэнь Хэжэнгын арадай театрай табиһан зүжэг тухай бэшээ һэмди.
Энэ удаа ехэ наадан баргажан гол руу нүүгээ гэжэ харанабди. Тэндэ арадай 3 театрнууд хабаадана. Харин арадай театрнууд бүхыдөө Хурамхаанда 6, Баргажанда 1 тоологдодог. Эдэ театрнууд баян намтартай, бултадаа театрай энэ хүдэлөөндэ хүүгэдые хабаадуулдаг юм. Тиигэжэ энэ үедөө бүхыдөө 200 гаран хүүгэд хабаадуулагдажа байна.
Декабриин 8-да Баян-Голой арадай театр Б. Бальжановай «Үнгэрһэн наһанай ургынууд» гэжэ зүжэг харуулба (найруулагшань Баяр Бадмаев). Тиихэдэ декабриин 9-дэ Барханай соёлой байшанда Уланхаанай арадай театр Г. Башкуева «Бүрэнхыдэ хашхараан» гэжэ зүжэг (найруулагшань Баяр Бадмаев), Дэрээнэй арадай театр Б. Жамбаловай (Дашын Баясхалан) «Урьха» (найруулагшань Намсарай Бадмаев) харуулбад. Декабриин 8-9-дэ аймагта зүжэгшын дүршэл хаоан абалгаар хэшээлнүүд үнгэрөө. Тэрэ хэшээлнүүдые Хоца Намсараевай нэрэмжэтэ Буряад театрай зүжэгшэн, Буряадай габьяата зүжэгшэн Билигто Дамбаев үнгэргэбэ. Буряад Уласай Соёлой яаманай гол мэргэжэлтэн Дмитрий Дылыков театрнуудай мүнөө үеын байдал тухай харагшад болон арадай театрнуудай зүжэгшэдтэ хөөрэжэ үгэбэ, үнгэрһэн эдэ хоёр зүжэгүүдые шүүмжэлгэ, һанал бодолнуудаа андалдаан үнгэрөө.
