«Буряад ороной үмэнэ габьяатай байһанай түлөө» гэһэн медаль декабриин 26-да «Монголой цахилгаан мэдээ» (МОНЦАМЭ) байрладаг газарта барюулагдаба. Энэ шагнал барюулхаяа Оросой Холбооной Буряад Уласһаа «Информ Полис» һониной захирал Туяна Зондуева ошоһон байна.
Б. Батхүү хадаа «Алтаргана» нааданай алтан медальда хүртэһэн, Монголой уран зохёолшодой холбооной шагналтан юм. Тэрэ 2000-2004 онуудта Буряад орондо ажаһуугаа. Тиихэ үедөө олон тоото зохёолнуудаа бэшэжэ, буряад, ород хэлэнүүд дээрэ толилуулһан юм. Тэрэнэй шүлэгүүд болон үгэнүүд дээрэнь бэшэгдэһэн дуунууд сахим номдо, һургуулида үзэхэ номууд соо оруулагданхай. «Жиком Пресс» хэблэлдэ «Аялгата һайхан буряад хэлэмни» гэһэн уран шүлэгэй суглуулбаринууд хэблэгдээ. Энэ хэблэлэй һонин талань гэхэдэ шүлэгүүдынь гурбан хэлэндэ оруулагдажа хэблэгдээ (монгол, буряад, ород). Буряад орондо байхадаа «Аялгата һайхан буряад хэлэмни», «Буряад-Монгол орон», «Байгал далай», «Алтаргана» гэһэн удха түгэлдэр шүлэгүүдээ зохёоһон байдаг.
Намжал Нимбуевай эжы Һамажаб Пыловнада «Һүн сагаан аялга» гэһэн зохёолоо тусагаар зорюулан бэшэһэн юм. Ушар юуб гэхэдэ 2003 ондо Намжал Нимбуевай нэрэмжэтэ уласхоорондын мүрысөөндэ илажа гараад, тэрэнэй гарһаа алим шагнал абаа бэлэй. Мэдээжэ хүгжэм зохёогшо, дуушан Бүринбаяр Батхүүгэй үгэнүүд дээрэ «Аба эжы хоёрни» гэһэн дуу бэшэһэн юм. Тэрэнь мүнөө мэдээжэ дуушан Чингис Раднаевай дууладаг дуунуудай нэгэн болонхой. Буряад орониие үндэр, омог үгын һайханаар магтан дуулаһан уран шүлэгшэ байха. Ииимэл габьяагайнгаа түлөө улас түрын үндэр хайра шагналда, Буряад ороной арад түмэнэй хүндэдэ хүртэбэ гээшэ. Энэ шагнал Буряадай ажахы һэргээлгэдэ, соёл, урлал болон болбосорол, гэгээрэлдэ, тамир хүгжөөлгэдэ, хуули болон элүүр энхые сахилгада горитой хубитаяа оруулһан Буряадай, Оросой Холбооной эрхэтэдтэ болон хари ороной эрхэтэдтэ олгогдодог гуримтай юм.
Болдын Батхүүгэй Буряад орондо ажаһуудаг танил нүхэдэйнь зүгһөө үндэр энэ шагналаарнь хани халуунаар амаршалаад, зохёохы амжалтануудые хүсэнэбди!
