Буряад хэлэн дээрэ бэшэгдэһэн уран зохёолнуудые хэблэлдэ шэлэн абалгын заншалта мүрысөө Буряад Уласай Соёлой яаман соносхобо.
Буряад хэлэн дээрэ бэшэгдэһэн эрхим зохёолнуудые хэблэжэ гаргаха, буряад хэлэн дээрэ хүдэлдэг хэблэл дэлгэрүүлэн хүгжөөлгэ гээшэ энэ мүрысөөнэй гол зорилго болоно.
Мүрысөөндэ табигдаха зохёолнуудые бэшээшэд байгша оной энэ һарын 16-һаа хоёрдугаар һарын 16 болотор мэдүүлгэнүүдээ бүридхэлдэ оруулха ёһотой. Шэлэн абалгын Зүблэл гурбан һарын 16-да шэлэгдэһэн зохёолнуудай дүн гаргажа элирхэйлхэ юм. Энэ аргаар хэблэгдэһэн номуудай нюур нээлын баяр арбан һарын тэн багаар үнгэржэ байдаг Буряад хэлэнэй үдэрнүүдэй үедэ Буряад Уласай үндэһэн номой санда үнгэрхэ ёһотой.
Ямар нэрлэгдэһэн заабаринуудаар тэдхэмжэ хараалагдааб гэхэдэ:
– Уран үгын шэди (прозо) – 400 000 түхэриг хүрэтэр
– Жэгүүртэ үгэ (уран шүлэг) – 250 000 түхэриг хүрэтэр
– Багашуулда (хүүгэдтэ зорюулагдаһан зохёолнууд) – 250 000 түхэриг хүрэтэр
– Заншалаа сахин һэргээе (ёһо заншалнуудай, хизаар ороной ба түүхын удхатай зохёолнууд) – 400 000 түхэриг хүрэтэр
– Уран үгын оршуулга (бусад хэлэнүүдһээ) – 200 000 түхэриг хүрэтэр
Нэрлэгдэһэн заабари бүхэндэ илагшад тодорходоо нэгэн гү, али нэгэнһээ дээшэшье байжа болохо.
Зохёол бэшэгшэ Буряад Уласай Соёлой яаманда оруулха гэбэл:
– Мэдүүлгэ
– Зохёолоо 2 хэһэгээр саарһан дээрэ гаргаад (А4 хэмжээнэй, Times New Roman дээрэ үзэгэй 14-дэхи хэмжүүрээр, мүрнүүдэй хоорондохи зай 1,5)
– Зохёол бүхэндэ 2 шүүмжэлэл
– Хэблэлэй гаргашануудые зааһан дансанууд
– Зохёолшын зүбшөөл (хэблэхэ, хэлсээ баталха б. б.)
Мүн лэ иимэрхүү маягаар ород хэлэн дээрэ хэблэгдэхэ зохёолнуудые шэлэн абалга амяараа үнгэрхэ ёһотой.
Асуудалнууд гаража болохо: Буряад Уласай Соёлой яаман, 314 үрөө.
Утаһан 21 77 04
