Буряад ороной арад түмэндэ, уран зохёолдо дуратайшуулда горитойхон бэлэг унажа ерэбэ гээ һаа алдуу болохогүй байха.
Ушар юуб гэхэдэ, Намжил Нимбуевай зохёолнууд хоёр боти соо оруулагдажа, «Буряад-Монгол ном» хэблэлээр гараба. Гайхалтай гоёор хэблэгдэһэн, ямаршье ушарнуудта, илангаяа Сагаан һарын һайндэртэ зохидхон бэлэг боложо болохо эдэ номуудые Буряад Уласай Үндэһэн номой сангай дэлгүүрһээ абажа болохо.
Энэ зохёолой нэгэдэхи ботидо: «Шүдэрлэгдэһэн сахилгаанууд» гэжэ ниитэ гаршаг доро ороһон шүлэгүүд. Эндэ түрүүшынхиеэ урдандаа оройдоошье хэблэгдээгүй шүлэглэмэл зохёолнууд, тиихэдэ монгол, буряад зохёолшод Намжил Нимбуевай оршуулгануудаар үгтэбэ.
Хоёрдохи ботидо: «Намжил» гэһэн ниитэ гаршаг доро прозоор бэшэгдэһэн зохёолнууд ород, буряад хэлэнүүд дээрэ. Энээн соо өөрынь буряад хэлэн дээрэ бэшэһэн зохёолнууд, баһал монгол, буряад зохёолшодые ород хэлэндэ оршуулһаниинь оробо.
Үшөө тиихэдэ Намжил Нимбуевай зохёолнуудые шэнжэлһэн хүдэлмэринүүд, нүхэдэйнь болон түрэлэйнь хүнүүдэй дурсалганууд оролсоо.
Буряадаймнай мэдээжэ уран шүлэгшэ Шираб Нимбуевай хүбүүн Намжил Нимбуев гайхалтай ехэ юумэ бэшэжэ үрдеэд, элир залуу наһандаа энэ дэлхэйһээ халижа ошоо һэмнэй даа. Поэдэй зохёолнуудые түрэһэн эгэшэнь – Любовь Ширабовна Базарова-Нимбуева үдэр һүнигүй, үргэһэ нойргүй хүдэлжэ суглуулан, эблүүлэн уран зохёолой иимэ номууд болгон хэблүүлбэ гээшэ.
Байгша оной хоёрдугаар һарын 19-эй 18:00 сагта Буряад театр соо тус номой нюур харалгын баярта ёһолол үнгэрхэ гэжэ мэдээсэнэбди.
Асуудалай гарабал +7 914 844 95 79 утаһаар холбоо тогтоожо, хөөрэлдэхэдэ болохо.
