Гараха һарын 18-да Захааминай аймагай Санага нютагта хубиин болон түлөөлгэтэ бүлэгүүдэй можо нютагууд хоорондын һэер сохилгоор мүрысөөн үнгэргэгдэхэ гэжэ зар тараба.
Энэ наадан-мүрысөөн дэлхэйн буряадуудай «Алтаргана-2016» нааданай абарга боложо тодорһон Санагын хүбүүн Денис Доноевай шагналда хүртэхын түлөө, Захааминай аймагай байгуулагдаһаар 90 жэлэй ойдо зорюулагдан үнгэргэгдэхэ гэжэ зар тараба.
Эмхидхэн байгуулагшад гэхэдэ «Захааминай аймаг» гэһэн нютагай засагай байгууламжын захиргаан, «Санага» гэһэн хүдөөгэй нютагай засагай байгууламжын захиргаан.
Һэер сохилгоор можо нютагууд хоорондын мүрысөөндэ Буряад Уласай аймагуудай, хүршэ Эрхүү можын, Үбэр-Байгалай хизаарай, эдэ хоёрой тоодо Усть-Ордагай, Агын тойрогуудай һэершэдтэ урилга айладхагдаа. Мүн лэ Улаан-Үдэ хотын болон хүршэ хотонуудай ниитын эмхинүүд, хамжаанууд, олзын хэрэг эрхилэгшэд уригдана.
Хабаадаха айлшадай (түлөөлгэтэ) бүлэгүүд доро дороо 5 хүнһээ бүридэхэ эрилтэ табигданхай. Хабаадагшадай наһанай илгаанууд гэбэл: 14 наһанһаа 21 хүрэтэр, 21-һээ 36 наһан хүрэтэр, 36 наһанһаа 51 наһан хүрэтэр, тиихэдэ 51 наһанһаа дээшэ. Эхэнэрнүүд амяараа бүлэгүүд боложо хабаадаха.
Хабаадаха айлшадай бүлэг бүхэн 5-5 һэер асарха. Тиихэдэ барандаа үндэһэн хубсаһаараа хабаадаха ёһотой.
Гол эрилтэнүүдэй зарим тэдыень һануулбал: Мүрысөөнэй эхилхэдэ хожомдонгүй оролсохо, архи уухагүй, шүүлгын бүлэгтэй гү, али хэн нэгэн гэшүүнтэй арсалдаа үүсхэхэгүй. Нэрлэгдэһэн эдэ бүгэдэнэй ушараа һаа, мүрысөөндэ хабаадалсаһан айлшадай бүлэгүүдые оноо хороолгын аргаар гэдэргэнь татаха гэһэн эрхэтэй байһанаа эмхидхэлэй хороон дуулгана.
Шагналнууд наһанай илгаануудаар түрүүшын гурбан һууринууд ами-аминдаа байха: 1-дэхи һуури – 30 000 түхэриг, 2-дохи һуури – 20 000 түхэриг, 3-дахи һуури – 10 000 түхэриг, Хүндэлэлэй үргэмжэнүүд.
Тиихэдэ хабаадаһан түлөөлгэтэ бүлэгүүдэй хоорондо иимэ шагналнууд хараалагданхай: Нэгэдэхи һууриин түлөө 70 000 түхэриг, хоёрдохи һууриин түлөө 50 000 түхэриг, гурбадахи һууриин түлөө 30 000 түхэриг.
Санагада һэер сохилгоор абарга боложо тодорһон хүндэ Дээдын шагнал гэжэ заагдаһан дааган байха.
Мүрысөөндэ хабаадахын түлөө уридшалан үгтэхэ түлбэри хараалагданхай, тэрэнь 5 000 түхэриг.
Бүхы асуудалнуудаар «Захааминай аймаг» гэһэн нютагай засагай байгууламжын захиргаанай Залуушуулай болон бэеын соёлой болон тамирай таһагта иимэ утаһануудаар холбоо тогтоожо хандаха:
8 (30137) 4-36-08; 8 (30137) 4-31-46; 8 914 980 30 85 – Батуев Арсалан Иванович,
8 914 058 22 08 – Осодоев Борис Владимирович,
8 924 651 90 86 – Жамьянов Баир Валентинович.
Хаяг: Закаменск хото, Ленинэй гудамжа, 17, 22-дохи үрөөн.
Һэершэ үндэр солыень үргэн, үргэн дуудалсыт!
Һайхан алдар нэрыень аймаг айлаар дабталсыт!
