Иимэ нэрэтэй можо нютагууд хоорондын ээлжээтэ наадан-урилдаанай болзор гараба.
Буряад Уласай Соёлой яаманай байгуулhан «Хуурайм наадан-2017» гэhэн можо нютагууд хоорондын наадан-урилдаа заншалта ёhоороо Арадай уран бүтээлэй улас түрын түб (РЦНТ) Улаан-Үдэдэ 2017 оной февралиин 17-18-най үдэрнүүдтэ үнгэргэхэ.
Буряад арадай хүгжэмэй зэмсэгүүд дээрэ наадагшадай, эдэ зэмсэгүүдые бүтээхэ уран гартанай тоо олошоруулха, бэлиг шадабарииень мүлин дээшэлүүлхэ гэhэн гол зорилготой энэ наадан-урилдаан табадахияа үнгэргэгдэхэнь.
Монгол туургатанай морин хуур гэжэ хүгжэмэй зэмсэг хүн бүхэндэ мэдээжэ. Харин олонхи зон имагтал буряад арадта сууха хуур байhан юм гэжэ дуулаашьегүй байжа магад. Юуб гэхэдэ, энэмнай хэрэглэгдэхээ болиходоо мартагдажа, үгы тооной болоhон юм. Сууха хуур бүтээхэ арга, хэрэглэгдэхэ бодосуудшье өөрын оньhотой, онсотой, тиимэhээл абяа дууниинь ондоохон, «буряад абяатай» гэгдэдэг байна.
Виндарья Ринчиновна Доржиева сууха хуураа hэргээел гэжэ анха түрүүн үүсхэл гаргажа, олониитэдэ хандаhан. Өөрынгөө мүнгөөр хэдэн зэмсэгүүдые Монголой габьяата артист Гуянгийн Балданцэрэндэ (Захааминай аймагhаа гарбалтай Норжимаа төөбиhөө сууха хуурай нюусатай танилсаhан) бүтээлгэжэ, хүгжэмэй hургуулинуудай шабинарта, оюутадта шагнуулжа, бэлэглэжэ, дэмбэрэлтэ хэрэгэй эхи табиhан габьяатай.
Буряадтамнай сууха хуур, ямаан хуур, мүн арадай бусад хүгжэмэй зэмсэгүүдые Очиржап Доржиевич Жамбалов өөрынгөө шаби Баир Бодиевтай урладаг, тиихэдэ Батомункуев Баир Зандраевич олон жэлдэ үрэжэлтэй хүдэлнэ.
«Хуурайм наадан-2017» гэһэн наадан-урилдаанда сууха хуур, хуур, морин хуур, хучир, лимбэ, суур, эбэр бүреэ болоод бусадшье буряад хүгжэмэй зэмсэгүүд дээрэ наадаха дуратайшуул, мэргэжэлтэ гүйсэдхэгшэд, ансамбльнууд хабаадаха юм.
Мүнөө жэлэй урилдаанда шэнэ нэрлэгдэһэн заабаринууд (номинацууд) нэмээгдээ. Энэ хоёр шэнээр нэрлэгдэһэн заабарида мэргэжэлтэ композиторнууд болон хүгжэм зохёохо дуратайшуул бэшэһэн зохёолнуудаа, тиихэдэ зэмсэг дархалдаг урашуул бүтээлнүүдээ харуулха юм.
Һайшаалтайнь гэхэдэ, нааданда хабаадаха дуратайшуулай тоо жэлһээ жэлдэ олошорно, илангаяа мүнөө жэлдэ зэмсэг бүтээгшэдэй тоо олон болоо. Тиихэдээ энэ наадан-урилдаанай арадтаа хэрэгтэй, холын хараа бодолтой байһан элирнэ.
Онсолон тэмдэглэмээр зүйл гэхэдэ, Оросой Буддын шажанай заншалта Сангха энэ хэрэг, энэ наадан-урилдаа дэмжэжэ, «Сууха хуур дээрэ эрхим гүйсэдхэгшэдэ» гэһэн 50 000 түхэригэй Дээдын шагнал барюулха.
Урилдаанай нэгэдэхи шата П. И. Чайковскийн нэрэмжэтэ дунда мэргэдэлэй урлалай һургуулида 2017 оной февралиин 17-до үнгэрхэ.
Түгэсхэлэй тоглолто февралиин 18-да Х. Намсараевай нэрэмжэтэ буряад драмын театрта болохо. Энэ тоглолтодо урилдаанай илагшад, тиихэдэ мэдээжэ хүгжэмшэн Балданцэрэнэй Баттүвшин болон бусад хүгжэм дуунда абьяастайшуул бэлиг шадабарияа дэлгэжэ, харагшадай шэхэнэйнь шэмэг, нюдэнэйнь хужар болохо, сэдьхэлыень баярлуулха гэжэ дуулгая. Үргэн олон харагшадаа энэ нааданда уринабди!
Наадан-урилдаан тухай дүрим болон бусад мэдээсэлнүүдые Арадай уран бүтээлэй улас түрын түбэй (РЦНТ) юртэмсын бусайдаһан соохи www.байкалфолк.рф. гэһэн буудалда орожо хаража болохо.
Зонхилогшо Дондукова Дагзама Дондуковна: 8(3012) 45-57-44; 45-51-35.
