Заха холын Захааминай үргэн Санага нютагта холые холо гэнгүй, олон тоото айлшад хоёрдугаар һарын 18-да буугаа. Аяар Агаһаа табан команда ерээ. Энэ ехэ мүрысөөндэ хамта дээрээ 48 команда, хэзээ хэзээнэйхиһээ олон хабаадагшад – 240 һээршэд, тэрэ тоодо 14 эхэнэрнүүд арга шадалаа туршаа.
Эгээл эдир, 14-һөө 20 хүрэтэр наһанай һээр шаагшадай дунда Санагын Аламжа Дылыков 3-дахи һуурида гараа. 2-дохи һуури Түнхэнэй “Бурхан Баабай” командын Жалсып Манзаров эзэлээ. Агын тойрогой “Ага-4” командын Буянто Цыбенов энэ бүлэгтэ илагша боложо тодорбо.
21-35 наһатайшуулай дунда Захааминай Хужарай Александр Жигжитов 3-дахи, Агын Зоригто Дашанимаев 2-дохи һууринуудые эзэлжэ, Ивалгын Хойто-Бэеын Батор Бадмаев (угаараа Санагын) илажа гараа.
36-50 наһатайшуулһаа Захааминай Ёнгорбойн Баяжап Лайдапов 3-дахи, Улаан-Үдын “Хадата Захаамин” командын Аркадий Жамбалов 2-дохи һуури эзэлээ. Агын Баир Намдаков илалта туйлаа.
51-һээ дээшэ наһатайшуулай бүлэгтэ захааминаархин шалгарба: 3-дахи һуурида Бадмажап Дармаев (“Хадата Захаамин”), 2-дохидо Владимир Цыдемпилов гаража, 64-тэй Илья Норбоев илажа, солоёо дуудуулба.
Мүрысөөндэ хабаадаһан 14 эхэнэрнүүдһээ захааминаархин мүн лэ бэрхэнүүд байһанаа харуулаа: 2-дохи һуури Дүтэлүүрэй Сарюна Жигжитова эзэлжэ, Санагын Цындыма Жамьянова 1-дэхи һуурида гараба. 3-дахи һууриин шангые 12 эхэнэрнүүд хубаагаа.
Эхэнэрнүүдэй дунда «Эрхим арга дүрэтэй» байһанай түлөө тусхай шан (4 мянган түхэриг) Ахын Юлия Будаевада барюулагдаба. Харин эрэшүүлэй дунда иимэ шанда Агын Баясхалан Цыреторов хүртэбэ.
«Эгээ залуу hээршэн» гэһэн тусхай шангаар, 3 мянган түхэригөөр, Санагын Амарсана Бадмаев (2004 оной) шагнагдаа. 1942 оной Доржо-Сэрэн Дымбрылов (Захааминай Нурта һуурин) «Эгээ үндэр наhатай hээршэн» гэжэ нэрлэгдээд, мүн лэ 3 мянган түхэриг шанда хүртэбэ.
Командын тоосоогоор түрүү һууринуудта гараа гэбэл: 1-дэхи һуурида –Ивалгын «Хойто бэе» (70 мянган түхэриг), 2-дохи һуурида – Санагын “Хүүгэдэй сэсэрлиг” (50 мянган түхэриг), 3-дахи һуурида – Захааминай “Дүтэлүүр” (30 мянган түхэриг).
Ивалгын «Хойто бэеын» Батор Бадмаев мүрысөөнэй абарга боложо, Арадай Хуралай һунгамал Баяр Цыденовай гарһаа хүлэг мориной жолоо барижа, буряад үүлтэрэй адуу үдхэхэеэ дааган шанда хүртөө.
Энэл үдэр шагай наадан үнгэргэгдэжэ, 68 хүн хабаадаа.
«Мори урилдаан» гэһэн нааданда Закаменскын Аюр Ардаев эрхимлээ, 2-дохи һуури – Захааминай Ёнгорбойн Батуева Сэлмэг, 3-дахи һуури Захааминай Үлэгшэнэй Мигмир Гармаев эзэлбэд.
Тиихэдэ «Шагай шүүрэлгээр» Санагын Байгалма Цыдемпилова бултанһаа булюу байжа, 1-дэхи һуури эзэлбэ. Харин 2-дохи һуурида Захааминай Шара-Азаргын Марина Лубсанова, 3-дахида Санагын Баярма Бахутова гэгшэд гараба.
«Шагай няhалалгаар» баһал Аюр Ардаев түрүүлбэ. Монголой Сэлэнгэ аймагай Болорма 2-дохи, Закаменск хотын Хорло Цыденова 3-дахи һууринуудые эзэлбэ.
Буряад шатараар уласхоорондын классай мастер Дмитрий Пушкарёвтой 20 шатаршад наадаа. Эгээл эрхимүүдыень нэрлэе: Захааминай Холтоһоной Владимир Руденко, Санагын Аюр Цынгенов болон Закаменск хотын Ошор Будаев.
