Оросой Уран зураашадай холбооной гэшүүн, уран зурааша-барималша Даша Намдаков 50 жэлэй саана энэл үедэ Шэтэ можын (мүнөө Үбэр-Байгалай хизаар) Үхэриг тосхондо түрэһэн юм. Тэрэнэй уран барималнуудай түрүүшын үзэсхэлэн 2000 оной февралиин 16-да Эрхүү хотын уран һайханай үзэсхэлэн дэлгэдэг газарта үнгэрһэн байгаа. Олон харагшадтай, дурсалгын һайхан хойшолонтой үзэсхэлэн мартагдаагүй. Удааншье болонгүй Даша-Нима Бальжановичые уран бүтээлнүүдээ дэлгэхыень Москвада уриба. Тэрэ үзэсхэлэнгынь Уран зураашадай түбтэ дэлгэгдээ, тэрэ үзэсхэлэндэ Оросой Холбооной залуу уран барималшад өөһэдынгөө хүдэлмэринүүдые дэлгэлсэһэн байгаа. Тиигэжэ Оросой ниислэлдэ Дашые мэдэжэ, тэрээн тухай хөөрэлдэдэг болоо. Тиигээд лэ Даша Намдаковой ёһотой «нүүдэлшын» ажабайдал эхилбэ гээшэ. Тодорхойлон хэлэбэл, 2000 онһоо Токио, Бээжэн хотонуудһаа захалаад Нью-Йорк, Лос-Анджелес хүрэтэр хэдэн арбаад үзэсхэлэнгүүд дэлгэгдэнэ. Мүнөө тэрэнэй хүдэлмэринүүд Ленинград хотодо Гүрэнэй Эрмитаж соо, Оросой үзэсхэлэн дэлгэдэг газарта, Зүүн зүгэй арадуудай урлалай танхимуудаар, тиихэдэ олон хүнүүдэй хубиин жасануудаар хадагалагдажа байдаг гэбэл: В. Путинай, М. Шаймиевай, Ю. Лужковай, Р. Абрамовичын болон бусад олоной. Тиихэдэ Германида, Францида, Бельгидэ, Швейцарида, Финляндида, Японидо, Америкэдэ, Тайваньда хубиин суглуулбаринууд соогуур бии гэнэ.
Мүнөө үедөө Улаан-Үдын һэдьбэн шэнэлэлгын «Лотос» хамжаанда «Байгалай сахюусан» гэһэн томо барималай эхин шатын ажалнууд даб дээрээ бороор бүтээгдэжэ эгээл түлэгтөө, эсэсэй шатада тэрэнь хүрэлөөр бүтээгдэжэ байрадаа бодхогдохо ёһотой юм.
Даша Намдаковай ошоогүй орон гүрэн гэжэ үгы юм бэшэ гү, ябаһан лэ газартаа айхабтар ехэ хүндэ дээгүүр ябадаг хүн гэжэ олон тоото хайра шагналнуудынь, нэрэ зэргэнүүдынь гэршэлнэ.
«Буряад Уласай арадай уран зурааша» гэһэн үндэр нэрэ зэргэдэ хүртэһэн тухай үнэмшэлгыень Даша Намдаковто Буряад Уласай Толгойлогшын уялгануудые саг зуура дүүргэгшэ А. С. Цыденов барюулаа.
Өөрөө Даша Бальжанович газар түбиие тойрон ябахадаа түрэл тоонтоһоонь оройдоошье таһарангүй, үргэлжэ харилсаатай ябадаг хүн юм. Үе үе болоод лэ нютагаа эрьежэ ерэдэг, Сагаалган бүхэндэ хии мориёо Үхэриг тоонтодоо хиидхэжэ, ухаан, сэдьхэлээ үндэр болгожо ошодог заншалтай юм. Даша-Нима Бальжановичта аза жаргал, үшөөшье үндэр амжалтануудые хүсөөд, Владислав Түгдэмэйн үгэнүүд дээрэ Бадамгаравын Наранбаатарай бэшэһэн нэгэ дуунай бадагаар домогтой суутай уран бүтээлшын сэдьхэжэ ябаһан бодолые элирхэйлэе:
«Үхэриг тоонтоо мартангүй
Үзэжэл хэзээш эрьюужэм.
Үнгэрхэ наһаа тоолонгүйгөөр
Үелжэл шамдаа нэнгүүжэм…»
