Хүүхэлдэйн театр алишье сагта ямаршье орон нютагта хүнүүдэй ямар нэгэн эди шэди харахаяа субадаг онсо газар ха юм. Тэрэ мүртөө энэнь ёһотойл энэрхы сэдьхэлэй, налархай зангай, ажабайдалай һургуули гээшэ. Энэ шэди, хүүхэлдэйн юртэмсэ дэлгэжэ харуулдаг хүнүүд харагшадые дулаагаар жэгнэдэг, үндэр ухаа бэлэглэдэг. Эдэ хүнүүд ямаршье наһанай харагшадта адли ойлгосотой болгожо, хүүхэлдэйнүүдтэ ами оруулна.
Юрын аад лэ үндэр үүргэтэй хүүхэлдэйн театр гайхамшаг байгуулга гээшэ. Манай Буряад Уласай дэбисхэр дээрэ энэ һайндэр энэ жэл анхан байгуулагдаһаар 50 жэлэйнгээ ойн баяр тэмдэглэхэ гэжэ бэлдэжэ байһан мэдээжэ «Үльгэр» театраймнай ажал ябуулга, ажабайдалтай нягта холбоотой.
Тиимэһээ «Үльгэр» театрайнгаа хамта олониие, манай театрта хабаатай бүхы хүнүүдые энэ мэргэжэлтэ һайндэрөөр үнэн зүрхэнһөө амаршалнаб!
Барандань зохёохы үндэр амжалта, үнэн сэхэ харагшадые, энхэ элүүрые, гэр бүлын болон хубиин аза жаргал хүсэнэб!
Буряад Уласай Соёлой сайдай уялгануудые дүүргэгшэ Т. Г. Цыбиков
