Буряад Уласай Соёлой яаман болон Буряад Уласай Болбосоролой болон эрдэм ухаанай яаман жэл бүри үнгэргэгдэжэ заншал болоһон «Буряад Уласай жэлэй эрхим ном» гэһэн ээлжээтэ мүрысөө соносхобо. Энэ мүрысөөн Буряад Улас дотор номой хэблэл хүгжөөхэ, тиихэдэ манай эндэ хэблэгдэһэн номуудай үүргэ зоной дунда дээшэлүүлхэ зорилготой үнгэргэгдэдэг бэлэй. Үшөө хэблэлнүүдэй шанар, тэдэнэй шэмэглэл дээшэлүүлхэ гэжэ гол үүргэнүүдэй нэгэн байха.
Үнгэрһэн жэлэй юһэн һараһаа нааша энэ жэлэй найман һара болотор хугасаа соо хэблэлһээ гараһан, Буряад Уласай үндэһэн номой һангай үндэһэн болон хизаар ороноо шэнжэлгын түбтэ заатагүй табигдаһан хэблэлнүүд энэ мүрысөөндэ хабаададаг гуримтай юм.
Тиихэдээ номууд болон хэблэлнүүд иимэ нэрлэгдэһэн заабаринуудаар харагдаха гэбэл:
«Жэлэй эрхим ном»
«Буряад хэлэн дээрэ жэлэй эрхим ном»
«Эрхимээр шэмэглэгдэһэн хэблэл»
«Хүүгэд болон эдиршүүлдэ гэжэ хэблэгдэһэн эрхим ном»
«Һуралсалай онол аргануудай эрхим хэблэл»
Урданһаа заншаһан гуримууд дээрээ үндэһэлэн, шагнал хайранууд Номой дугыланай үедэ, тэрэнэй гол хэмжээ ябуулга гэжэ тоологдон, барюулагдаха. Энэ жэлэй Номой дугылан юһэн һарын 29, 30-най үдэрнүүдтэ үнгэрхэ гээд шиидхэбэри абтанхай.
Мүрысөөндэ хабаадахын тула:
– мэдүүлгэ
– хэблэл, 1 хэһэг
– мэргэжэлтэ нюурнуудай энэ хэблэл тушаа элирхэйлһэн бодомжонууд, 2
хэһэгһээ үсөөн бэшэ
– олондо мэдээсэл тараадаг хэрэгсэлнүүдэй тус хэблэл тушаа бэшэһэн
(харуулһан, хөөрэһэн) һаань, тэдэ мэдээсэлнүүдыень
Мүрысөөндэ табигдаһан хэблэлнүүдэй түлөө түлбэри түлэгдэхэгүй, тэдэ хэблэлнүүд бусаагдахагүй, хэблэлнүүд Буряад Уласай үндэһэн номой һанда дамжуулагдаха.
Иимэ хаягаар захил абтана гэбэл:
Улаан-Үдэ, Ленинэй гудамжа, 30, 314-дэхи таһалга, Буряад Уласай Соёлой яаманай номой һангуудай болон арадай уран бүтээлнүүдэй таһагта 2017 оной юһэн һарын 15 болотор.
