Монголой, Хитадай, Наран Уласай болон Оросой хэдэн театрнууд, хамта дээрээ хүүхэлдэйн 12 театрнууд юһэн һарын 3-һаа 7 болотор Улаан-Үдэдэ үнгэрхэ Уласхоорондын III фестивальда ерэхэ болоод байна.
Энэ ехэ наадые Эрдэни Жалцановай найруулан табиһан «Һалхинтай хөөрэлдэгшэ» гэһэн шэнэ зүжэг нээхэ. Энэ зүжэг урданай буряад-монгол дуунууд дээрэ домогуудаар үндэһэлэгдэн табигдаһан юм.
Мүрысөөнэй гуримаар үнгэрхэ ехэ нааданда Санкт-Петербург хотын Е. С. Деммениин нэрэмжэтэ хүүхэлдэйн театрай, Братск хотын хүүхэлдэйн театрай зүжэгүүд, Татар Уласай «Экият» гэжэ хүүхэлдэйн театрай «Ямаан ба Хонин» гэжэ зүжэг, Железногорскын «Алтан түлхюур» гэжэ театрай «Хатан Баха» гэжэ зүжэг, тиихэдэ «Эбтэй дүрбэн» гэжэ Үбэр Байгалай хизаарай театрай буряад онтохон, Саха, Тыва Уласуудай театрнуудай зүжэгүүд эдир харагшадта дурадхагдана.
Ехэ наадан нэгэ доро Улаан-Үдын гурбан тайзанууд дээрэ ябажа байха юм гэбэл: «Үльгэр» театрай, Буряад театрай, тиихэдэ Н. Бестужевай нэрэмжэтэ ород драмын театрай тайзанууд нэгэ доро хүдэлжэ байхаар хараалагданхай.
Юһэн һарын 7-до Санкт-Петербургын Ехэ театрай нүүдэл тоглолтонуудай нээлгын баяраар ехэ нааданай хаалгын ёһолол үнгэрхэ. Удаань, юһэн һарын 11 болотор Ленинград хотын хүүхлдэйн театрай «Екклесиаст», «Мы», «Холстомер» гэһэн ехэшүүлдэ зорюулагдаһан, тиихэдэ «Айболит», «Снежинка» гэһэн хүүгэдтэ зорюулагдаһан зүжэгүүд гарахаар хүлеэгдэнэ.
Тиигэжэ энэ ехэ хэмжээ ябуулгаар манай «Үльгэр» театр анхан байгуулагдаһаар 50 жэлэйнгээ ойн баярые тэмдэглэхэнь гээшэ.
