Зүүн Зүгэй литээр Шэнэ жэлэй, Сагаалганай баярта зорюулагдаһан найр нааданууд февралиин 17-һоо захалаад ябажа байна.
– Айхабтар гоё наада харабабди, юун гэһэн аза гээшэб! Амаржа гарабабди. Һайндэрэй оршон байгуулагдажа, сэдьхэл сэнгүүлмэ һайхан наадан болобо гээшэ, – гэжэ тоглолтын үдэшэнүүдэй нэгэндэ театрта гэр бүлөөрөө ерэһэн Валентина Лубсановна хэлэжэ хариба. Үхибүүдыньшье ухаангүй баяртайнууд. Буряад арадай гансахан һайндэр Сагаалганда Буряад театр ордон соогоо хүдөөгэйнгөө аймагуудые угтажа Сагаалдаг һайхан заншалтай бэлэй. Энэ жэлшье эндэ Агын, Зэдын, Яруунын болон бусад аймаг нютагуудай арад зон сугларжа сэнгэбэ, зугаалба, хүхибэ ха юм.
Театрай найруулан табижа наадаһан «Нохой жэлэй найр наадан» олон зоной Шэнэ жэлдээ эхилһэн түрүүшын алхам боложо, һайн һайханай, баяр зугаагай оршондо сэдьхэл тэнигэлэн он жэлээ һэлгэжэ байһанай тэмдэг боложо үгэбэ.
Энэ хадаа энэ жэлээ зохидоор, урагшатай эхилһэнэй гүнзэгы удха гэхээр.
Элинсэгэйнгээ эхилжэ зохёоһон малшын һайндэртэ хабаадаһайбди гэжэ харагшадай мэдүүлһэн ушарые дэмжэжэ, театрнай энэ һарын 28-да «Нохой жэлэйнгээ найр наадые» дахин дабтахань гээшэ. 18 саг 30 минутаһаа захалха, театр тээшээ хожомдонгүй яараял даа.
