Мэргэжэлтэдые бэлдэхэ, илангаяа хүдөөгэй соёлой, олон жэлнүүдэй туршада шиидхэгдэжэ захадаа гараагүй асуудалнуудые шиидхэхэ арга нүхэсэл олгохо ёһотой гэһэн найдал байна. Тиихэдэ эрдэмэй туйлалтануудые хэрэглэхэ боломжо бии болохо ёһотой.
Тиимэ зорилготой февралиин 22-то Буряад Уласай Соёлой сайд Соёлма Дагаева Зүүн-Сибиириин соёлой дээдэ һургуулиин захиралай уялгануудые дүүргэгшэ Елена Перова хоёрой уулзалга үнгэрөө. Уулзалгын гол дүн гэхэдэ – харилсаа тогтоохо хэлсээндэ гар табигдаа. Соёлой сайдай үүсхэлээр хүдөөгэй соёлой хүдэлмэрилэгшэдые бэлдэхэ хэрэгтэ гол анхарал хандуулха асуудал, тиихэдэ соёлой, урлалай талаар мэдээсэлэй оршон байгуулха, Буряад Уласай 100 жэлэй ойдо бэлэдхэл ябуулха б. б. асуудалнууд хэлсээндэ дотор оруулагдаа.
– Тон шухала асуудалнууд дээрэ тогтообди, илангаяа хүдөөгэй соёлшодые гаргашыень даажа бэлдэхэ, тэдэнэй мэргэжэл дээшэлүүлгын асуудалнуудые саг соонь анхаржа байха. Үшөө тиихэдэ оюутадай дуури бүжэгэй театрта, уласай үндэһэн номой һанда мэргэжэлэй дүршэл гараха асуудалнуудые щиидхэхэ. Гадна хамтын зохёохы хэмжээ ябуулгануудые үнгэргэжэ байха тухай хөөрэлдөөбди, – гэжэ Соёлой дээдэ һургуулиин зохёохы асуудалнуудаар захиралай орлогшын уялгануудые дүүргэгшэ Виктор Столбовский дуулгаба.
