Эдир зүжэгшэд театрай урлалай хэдэн шэглэлээр шэнэ зүжэгүүдые дурадхаха гэбэл: драмын, энеэдэнэй, хүүхэлдэйн, үльгэр онтохонуудай, самай, хүгжэмтэ зүжэгүүд.
Зүжэгшэдөө бишыханууд гэжэ голонгүй, тэдэнэй наадые шүүлгын мэргэжэлтэ бүлэг сэгнэхэ юм. Тэрэ бүлэгэй тоодо Буряадай театрнуудай найруулагшад, зүжэгшэд, Зүүн-Сибириин соёлой дээдэ һургуулиин багшанар оролсоно. Илагшадые иимэ нэрлэгдэһэн заабаринуудаар хаража сэгнэхэ гэбэл: «Зүжэгэй эрхим хүдэлмэри», «Зүжэгэй үзэгдэлнүүдтэ эрхимээр наадагша», «Зүжэгые хүгжэмэй талаар эрхимээр шэмэглэгшэ», «Тайзанай эрхим хубсаһан», «Зүжэгэй эрхим зураг (байгуулга)», «Найруулгын эрхим хүдэлмэри».
Энэ ехэ наадан-мүрысөөе эмхидхэн байгуулагшад: Буряад Уласай Соёлой яаман, Буряадай улас түрын уран бэлигэй түб, Буряадай улас түрын хүүхэлдэйн театр «Үльгэр».
Наадан дээрэ заагдаһан 13-14-нэй үдэрнүүдтэ дуу хүгжэмэй байшангай тоглолтын танхим соо 10 сагһаа эхилхэ юм.
