Ехэнхидээ агнууриин үедэл зэдэлдэг байһан урда галабай хүгжэмэй зэмсэг ЭБЭР БҮРЕЭ мүнөөшье шанараа алдажа хэрэгһээ гараагүй. Мүнөө үедөө ондоогоор хэрэглэгдэдэг болонхой – хүгжэмэй энэ зэмсэг дээрэ хүгжэмэй жэшээтэ баялигуудһаа эхилээд арадай хүгжэм хүрэтэр ямарханшье аялгануудые наадажа болохоор байна. «Талада хүлэгэй түбэрөөн» – хүгжэмэй шэнэ зохёол. Һая байгуулагдаһан энэ шэнэ бүлэгэй хүгжэмшэд энээхэн «…түбэрөөниие» манай нюур танюулха тэмдэг гэжэ нэрлээ.
Жаргал Омоктуев, хүгжэмшэн: «Энэ түсэлнай бүхыдөө шэнэ. Оройдоошье наадагдаагүй хүгжэм дуун бии. Ехэнхидээ хөөмэй аялга, магтаалнууд, ёохорнууд, Гол түлэб манай арадай дуунууд лэ даа».
Урданайнгаа «зөөринүүдтэ» оршон үеын маяг оруулан тааруулха зорилготой. Шагнагшаднай хүгжэмэй арадай зохёол шэнэлһэн сахим хүгжэм шагнаха аргатай болохо. Энэ хадаа мүнөө үедөө буруун оронуудта ехэ дэлгэрэнги юм байгаа. Үндэһэн «Байгал» театрай хүгжэмэй арадай зэмсэгүүдэй шуулгын байбашье, «Дайда» бүлэг дайда дэлхэйгээр, орон нютагаараа нүүдэл тоглолтонуудта тэдээнһээнь олошье удаа ябажа байхадаа болохо гэһэн бодомжо бии.
Баттулга Галмандах, хүгжэмэй шуулга хүтэлэгшэ, дуу хатарай «Байгал» театрай хүгжэмэй талаар хүтэлбэрилэгшэ: «Нээрээл дэлхэй дайдаар ехээр ябадаг бүлэг болохо байха гэжэ найданабди».
Галсан Ошоров, хүгжэмшэн: "Театрай шуулга – энэмнай ондоо гээшэ ааб даа. Тэндэ хүгжэмэй тэмдэгүүдые хаража наадана ха юмбибди. Эндэ – ондоо, эндэ хүгжэм байгуулнабди. Бултадаа һуугаад зүбшэнэбди".
Гадна үндэһэн хүгжэм бисалгал боложо, хүнэй бэеые элүүржүүлхэ шэдитэй юм, тэрэ аялга хүгжэм руунь шэнгэжэ шадаха хэрэгтэй, тиигээл һаа.
Шэмхэжэ наададаг зэмсэг, морин хуур болон урданай зэмсэгүүдэй аялга дүрбэн һарын 23-да Буряадай хүгжэм дуунай байшанда шагнаха аргатайт, удаань «Дайдын» хүгжэмшэд Хитад, Монгол руу түрүүшынгээ нүүдэл тоглолтодо ошохо түсэб табинхай.
